DARO: Peranak Kampung Penasu enggau tujuh rumah panjai di Nanga Semah diatu udah nerima bekal ai beresi ke meruan agi nengah Projek Bekal Ai Alternatif Sarawak SAWAS).Kaban Kunsil Nengeri (ADUN) Daro, Dr Safiee Ahmad madah, projek nya udah tembu menyana lalu nya nambah perengkaguna pemun ba menua pesisir.

Ku iya, projek nya ngayanka Perintah Sarawak seruran naka ulih nentuka peranak menua pesisir bela ngasai perengkaguna pemun bisi kualiti sebaka enggau menua bukai.

“Kitai berasai gaga laban peranak ba Peranak Kampung Penasu enggau tujuh rumah panjai di Nanga Semah diatu udah bisi bekal ai beresi nengah projek SAWAS.

“Tu ngayanka Perintah Sarawak seruran naka ulih nentuka peranak menua pesisir bela ngasai perengkaguna pemun bisi kualiti sebaka enggau menua bukai,” ku iya.

Safiee nyebut jaku nya lebuh bejadi Pengawa Ngelanchar Tumu Projek SAWAS ba Kampung Penasu enggau Nanga Semah di Tangki Tinggi SAWAS Nanga Semah, empai lama.

Iya madah, projek nya tembu digaga kena 14 Mei 2026 lalu bekal ai beresi ulih disambung ngagai semua peranak Kampung Penasu serwta tujuh rumah panjai di Nanga Semah.

“Perengkaguna tu dikearap ulih dikena manah peranak dia, ukai semina nambah tikas pengerai enggau pengelantang aja.

“Aku mega ngarap ke bekal ai tu ulih nyadi penyungkak pemansang sosioekonomi komuniti menua nya,” ku iya andal.

Safiee nyemetak madah ke Perintah Sarawak deka majak meri perati ngagai projek pemansang menua pesisir, kelebih agi perengkaguna pemun baka bekal ai beresi, bekal kuasa karan enggau rentayan jalai alun dikena nambahka tikas idup rayat.

Pengawa nya mega digulu Residen Bagi Mukah, Bujang Rahman Seli; Pegawai Pelilih Daro, Zul Usup; Injinir Ai Bagi Menua Opis Bekal Ai Menua Pesisir (JBALB) Mukah, Mickly Irai Jawa; Pegawai Betanam Betupi Indu Opis Opis Betanam Betupi Sarawak, Faizulnizam Malim Sharifmalim; pengarl Pegawai Betanam Betupi Bagi Menua Mukah, Bibi Diyana Japar enggau Pegawai Nguasa Pelilih Daro, Jinggan Nyambong. – EDISI UKAS