MUKAH: Peranak di Mukah dilalau seruran bejimat enggau ngemerat pengelikun diri lebuh sekeda endur berengkah ditiki ai.
Kaban Kunsil Nengeri (ADUN) Tellian, Royston Valentine madah ke pengirau diri lebuh meda gaya hari ti enda ngetu ujan.
“Berapa bulan ti udah, kitai dituntung penusah bah besai lalu ngarap sekali tu, kitai nyikap diri napi sebarang penusah ti ulih nyadi sebarang maya.
“Pia mega, Tuai Komuniti enggau Tuai Raban Bansa (KMKK) patut ngesan pangku pengawa besai nyadung penerang ngagai rayat ba baruh pegai sida ngambi bela ngemerat pengelikun diri empu,” ku iya.
Royston mansutka jaku nya rambau dirandau pemberita pengudah Program Aram Bebuka Puasa di Pelaman Pehin Setia Raja ditu, kemari.
Berebak enggau nya, iya andal Komiti Penyangga Penusah Bagi Menua Mukah sereta ejensi bekaul udah nyikap diri bejalaika operasyen mantu nyema gelumbang ketiga bah nyadi.
Iya ngarap semua peranak di Mukah semampai bejimat enggau nyaga pengelikun diri empu.
“Kitai enda ngarap penusah tu nyadi tang kitai patut seruran bejimat napi sebarang penusah ti ulih nyadi,” tampung iya.
