SIBU: Raban Kristian ba Sungai Rassau ditu lantang pengudah titi kayu ti suah dikena sida nuju Gerija Mit St Vincent tembu diseleti.

Pekara nya dibantai Kaban Parlimen Sibu, Oscar Ling Chai Yew ba sebengkah penerang ti dkunsika iya ba media rama iya kemari.

Iya madah, projek nyeleti titi kayu nyadi titi besi nya ngena agih belanja Projek Siruka Rayat 2023 ari Perintah Besai.

“Aku ngena agih belanja nya dikena nembuka projek nyilih titi kayu ti udah repuk ngena titi besi ti baru.

“Titi tu nyambung rumah panjai nya enggau rumah panjai bukai nyengkaum gerija, pengkalan enggau sekula ba sitak Rassau,” terang iya.

Ling madah, titi nya nyadi fasiliti pemun ungkup peranak rumah panjai nya tang udah repuk sereta ulih ngeruga pengelikun peranak rumah panjai dia.

“Nengah agih belanja tu, kami ulih ngaga titi besi sepanjai 160 meter ke pemaik peranak Kampung Rassau bejalai kaki lalu raban Kristian Katolik ulih besembiang ba gerija nya,” ku iya tang nadai madahka ungkus projek nya.

Iya ngarap projek nya ulih meri pemaik ngagai peranak dia ngambi ngasaika idup likun.