Perati baru pampas rumah ti dipindah ketegal Projek Pan Borneo – Gira

SELANGAU: Kaban Kunsil Nengeri (Adun) Tamin Ir Christopher Gira Sambang minta perintah beratika baru bayar pampas rumah peranak ti dipindah ketegal bejalaika Projek Jalai Besai Pan Borneo.

Ku iya, bayar pampas ngagai peranak ti dipindah mega mesti diperati baru.

Pia mega ku iya, kebuah pia laban pampas ti dibayar sebedau semina mungkur ungkus rega rumah, kilang enggau ke bukai.

“Aku ngarapka perintah mega ulih mayar pampas ngagai sida tu enggau chara bukai lalu beratika ungkus tauka ari pekara bukai.

“Perintah ulih meri bantu baka kereban berumah enggau masukka ungkus pampas dikena mayar sambung karan sereta jalai ngelawa rumah panjai baru,” ku iya.

Gira mansutka jaku nya lebuh bejadika taba rumah panjai baru Rumah Andi Manggui di Sungai Sebaya, Selangau, apin lama ke udah.
Sama datai Pemancha Mathew Ganggang, Penghulu Thomas Jawa sereta bala bukai.

Ku Gira, penyampau bayar pampas ti diberi sebedau tu mega enda nyengkaum bayar sambung karan enggau ai.

Iya madahka peranak rumah panjai nyau mayar kereban utiliti kediri pengudah sida pindah ngagai rumah panjai baru sida.

“Aku udah mantaika penanggul tu dalam Aum Dun, tang sida madahka sida tetap mayar pampas baka sebedau tu.

“Nya alai, aku ngarapka perintah ulih berundingka chara bukai mantu sida tu,” ku Gira.

Suara Sarawak