Perintah nadai ngambi tanah rayat ngena Sekyen 6

KUCHING: Sapit Kepala Menteri Datuk Amar Douglas Uggah Embas madah Perintah Sarawak nadai ngambi tanah ari rayat sengapa nengah Seksyen 6 Kanun Tanah Sarawak.

Ku iya, orang ke meri penerang ti salah ngagai sida ke beempu tanah nya bengap lalu arapka rayat anang mudah pechaya ngagai jaku sekeda piak ti nguji ngajum sida.

“Piak ti baka nya (ngajum) laban ninding pekara manah dipejalaika Perintah Sarawak dalam mutarka penanggul ditapi rayat.

“Nya kebuah sida bebendar nambahka penanggul rayat menua tu lalu nguji deka mechah penyerakup kitai,” ku iya.

Uggah madah munyi nya ba Pengerami Makai Lemai Randau Kanun Tanah (Pindaan) 2018 Zon Selatan ba sebuah hotel tebilang ditu, kemari.

Nangkan nya ku iya, ba baruh Seksyen 6 siti lot tanah ba nengeri tu disukat kelingi lalu digazet nyadi Rizab Komunal Bumiputera nyengkaum tanah di Krian ke alai lebih 54,000 hektar udah disurvei.

“Malam tu aku meri jamin ngagai semua kita, tanah ti udah disurvei lalu digazet ba baruh Seksyen 6 nya endang diempu kita!” ku iya madah nyemetak.

Uggah ti mega nyadi Menteri Betanam Betupi, Tanah Adat enggau Pemansang Kandang Menua madahka pekara tu seruran dipansutka siku ari Adun rambau Aum Dun tu tadi.

“Iya (Adun) madahka Seksyen 6 dikena Perintah Sarawak ngambi tanah rayat ngena chara ngaga pemansang infrastruktur baka jalai enggau sekula tang nadai dibayar pampas.

“Tang lebuh siku ari Adun Gempung Parti Sarawak (GPS) nanya bukti ari pekara nya, iya enda ulih mantaika siti bukti pan bekaul enggau pekara nya,” ku iya nerang.

Ku Uggah, pengudah tanah nya disukat kelingi, pala tanah mega deka diberi ngagai sida ke bempu nya, lalu sida enda patut irau ke pekara nya.

“Enti tanah nya dikena ketegal deka ngaga pemansang ngagai rayat, tentu iya Perintah Sarawak deka meri pampas lalu naka ke diatu, kami udah mayar RM37 juta pampas ngagai tanah ke bekaul,” ku iya nambah.

Uggah mega madahka ba Bajet Nengeri 2020 tu tadi, Kepala Menteri Datuk Patinggi Abang Johari Tun Openg ngungkupka RM40 juta dikena nyukat kelingi tanah NCR.

“Taun tu aja kami udah nyukat mayuh tanah ngena Seksyen 6 lalu ba taun baru, tanah nya deka disukat ngena Seksyen 18.

“Tanah nya deka diberi surat pala tanah ti deka diempu sida belama iya lalu kami ngarapka Seksyen 6 deka seruran dikena laban tu mih siti chara dikena magi tanah nengeri enggau tanah bumiputera,” ku iya nambah baru.

Bela datai ngagai pengerami nya ex-Sapit Kepala Menteri ti mega nyadi Penyanding Penemu Pansik Sains Sarawak Tan Sri Alfred Jabu Numpang, Sekretari Nengeri Sarawak Datuk Amar Jaul Samion, Menteri Pelajar, Sains enggau Pansik Teknologi Datuk Seri Michael Manyin Jawong, Menteri Kaunsil Kandang Menua enggau Pengawa Berumah Datuk Seri Dr Sim Kui Hian, Menteri Muda Betanam Betupi, Tanah Adat enggau Pemansang Kandang Datuk Roland Sagah Wee Inn enggau Menteri Muda ba Opis Kepala Menteri (Undang-Undang enggau Adat Bumiputera) Datuk John Sikie Tayai.

Suara Sarawak