KUCHING: Perintah Sarawak nyendia agih belanja sepenyampau RM300 juta ungkup nyeleti enggau ngemanahka agi fasiliti lumba dikena napi Lumba Malaysia (Sukma) XXI Sarawak 2024.
Menteri Nembiak, Lumba enggau Pemansang Orang Dagang Sarawak, Datuk Seri Abdul Karim Rahman Hamzah madah, pengawa beranakka puku nya peluang Sarawak ngemanahka agi infrastruktur lumba ti endang bisi.
Iya madah, nya ukai semina dikena napi Sukma XXI Sarawak 2024 tang ungkup guna pengudah nya.
“Agih belanja dikena nyeleti nya disediaka begulai Perintah Sarawak enggau Perintah Besai.
“Ungkup rikod, perintah nengeri empu nyendia agih belanja RM300 juta ungkup tuju nya.
“Pengawa nyikap ngatur program lumba tu begunaka perambu silik ari genap sukut lalu udah tentu begunaka sinergi ti tegap ba raban opis menteri, opis enggau ejensi perintah sekali ke ba renggat Perintah Besai tauka perintah nengeri.
“Kelimpah nerima kerejasama aktif ari gerempung lumba nengeri tuai rumah enggau bakih strategik ti bukai,” ku iya.
Karim mansutka jaku nya rambau bejaku ba Pengerami Makai Lemai Sukma ti diatur ba Palan Konvensyen Borneo Kuching (BCCK) ditu, malam kemari.
Nya alai, iya ngarap Sukma ti bepelasarka konsep ‘lumba ungkup komuniti’ nyadi chunto pemadu manah ti mandangka lumba nyadi pelasar ngempung rayat.
