Pesaka asal Melanau di Kampung Sok ditan

MATU: Rumah panjai Melanau di Kampung Sok Matu deka diseliti perintah dikena ngetanka pesaka asal bansa Melanau ti ngundan mayuh tipan jerita lama.

Pejalai gawa khas diatur piak Muzium Sarawak kemari deka ngabas enggau beratika pekara ti patut diintu enggau diseliti ba begunan lama ti udah direjista di baruh Ordinan Heritage Sarawak nya.

Pejalai nya diuluka Direktor Opis Muzium Sarawak, Suria Bujang disempulang Chairman Kaunsil Adat Melanau, Datuk Aidan Wing, Opis Menteri Dagang Temuai Sarawak, pengari Opis Kereja Raya (JKR) Kuching Mukah enggau Daro, Opis Tanah enggau Survey Mukah enggau Kort Bumiputera sereta Opis Pelilih Matu.

Kaban Kunsil Nengeri (Adun) Jemoreng, Datuk Dr Juanda Jaya madahka piak Muzium endang keran enggau naka ulih bejalaika pengawa ngintu ngambika bala temuai ari luar datai kitu meda pesaka asal Melanau nya.

Enti mujur jemah ku iya, pengawa rejista pesaka asal Melanau nya ba renggat pemadu tinggi ba tikas entarabansa, Serakup Pelajar, Saintifik enggau Main Asal Gerempung Nasional Besatu (UNESCO) di Paris tau dipejalai.

TIPAN KENANG… Juanda (empat kanan) nerang pasal penatai asal Rumah Panjai Melanau ngagai piak Muzium Sarawak enggau bala bukai.

“Tu asil ari pansik ngemanah ti udah dipinta aku ngambika dipejalai Opis Pelilih Matu enggau JKR Matu Daro dalam taun 2018.

“Lalu Mac 2019 aku udah mantaika keretas kereja ti disedia asil pansik nya ngagai Kepala Menteri.

“Puji Tuhan Kepala Menteri ngemendarka agih belanja ungkup pengawa ngintu begunan lama tu.

“Berindik ari nya mega sebengkah aum renggat pengatur pengawa pemadu tinggi udah diatur di Kuching dalam bulan April 2019 dientudika aum di Mukah.

“Pengudah nya atur pejalai ngabas begunan tu dipejalai,” ku iya ba penerang nengah akaun Facebook iya tadi.

PEMATAK TEMUAI… Rumah Panjai Melanau di Sok ti deka diintu nitihka pematut.

Nya kebuah iya minta semua peranak Rumah Panjai Melanau meri sukung enggau enda kelalu ngira diri empu aja nentuka peasaka asal tu seruran diintu meruan.

Seraya mantaika diri lantang, Juanda mega ngarapka piak Muzium Sarawak ulih ngasuh juluk numbuhka rumah mijum idup ungkup komuniti Melanau ba rumah panjai nya nyadi nyata.

“Semua pekara bekaul enggau komuniti Menalau ditu deka dipandang ba Rumah Panjai tu ila.

“Tu peluang komuniti Melanau enggau semua kitai ditu nyapai juluk ngelama tu ti deka meda pesaka kitai diintu nitihka pematut,” ku iya madah nyemetak.