SIBU: Pengari Gerempung Nasional Nembiak Begempung Sarawak (SABERKAS) diansak milih bala tuai ke bepenau enggau lurus gawa nentuka pekara wang gerempung nya majak tegap ungkup timpuh tiga taun deka datai.
Menteri Nembiak, Lumba enggau Pemansang Orang Dagang ke mega Presiden SABERKAS, Dato Sri Abdul Karim Rahman Hamzah madah, penuduk pekara wang gerempung nya diatu majak entap lalu pekara nya begunaka raban pengatur ti bisi tanggungpengawa dikena nyamin pemujur gerempung nya.
“Enti penuduk pekara wang kitai majak tegap, kitai patut seruran bejimat. Penuai runding enggau pejalai pemansang gerempung tu bepanggai ba raban pengatur ke lurus gawa.
“Nya kebuah, aku ngarap ke semua pengari pintar milih tuai ke patut ngemudi SABERKAS kandang tiga taun deka datai ba pengawa bepilih pagila,” ku iya.
Iya nyebut jaku nya ba Pengerami Makai Lemai Ngelalu Penatai serimbai Gempuru Besai Tiga Taun Sekali (TGM) SABERKAS Sarawak Ke-18, ditu, Hari Enam.
Menteri Dagang Temuai, Industri Kreatif enggau Seni Pemerindang Sarawak nya madah, pengawa bepilih tuai baru patut berundingka penau chalun nampung penyulut sereta nentuka pemujur gerempung nya.
Ku iya, ripot pekara wang SABERKAS deka dibantai Tukang Wang maya TGM dikena meri peragam bekaul penuduk pekara wang gerempung maya diatu.
Berebak enggau nya, ku iya, TGM sekali tu ngerikod pemayuh tubuh bala ke datai enggau 82 pampang nganjung pengari enggau pemerati ngaul 411 penyereta, kelimpah 66 kaban Komiti Eksekutif (EXCO) sereta temuai dikangau khas.
Sama datai, Sekretari Besai SABERKAS ke mega Kaban Kunsil Nengeri (ADUN) Daro Safiee Ahmad, Sapit Presiden SABERKAS ke mega Sapit Menteri Nembiak, Lumba enggau Pemansang Orang Dagang Sarawak Datuk Gerald Rentap Jabu, Mandal Presiden SABERKAS ke mega Sapit Menteri Pengerai Mensia Mayuh, Pengawa Berumah enggau Perintah Lokal Sarawak Datuk Michael Tiang Ming Tee sereta Mandal Presiden SABERKAS ke mega Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai) Datuk Sharifah Hasidah Sayeed Aman Ghazali. — EDISI UKAS
