PKN Sarawak mantu raban gawa diluan di Sepital Sibu

SIBU: Berindik ari Atur Mindah Betagang (PKP) diteritka di Pelilih Sibu, raban Penggerak Komuniti Negara (PKN) Wilayah Sarawak pagi kemari bejalaika inisiatif mantu raban gawa diluan.
Chairperson komiti nya, Nurhanim Dato Hanna Mokhsen madahka sida sinuka pengiruh enggau pengelelak raban nya ke gawa ngelui ari jam ke patut nentuka pengelikun rayat di pelilih nya.
Ku iya, tu sebagi ari tanggung pengawa raban sida ke nyadi gempung ukai dikuasa perintah (NGO) mantu raban ti digerah gawaka komuniti.
“Taja bantu tu enda nyengala mayuh tang kami ngarapka iya ulih meri peransang ngagai sida ke gawa betapi enggau munsuh ti enda dipeda tu.
“Ari nya kami ngarapka mayuh agi raban NGO bukai besaup mantu raban ti begunaka bantu kelimpah ari raban gawa di luan.
“Kebuah pia laban agi tubah ruang bilik ngasaika tating penusah berindik ari atur dipejalai dikena nagang Covid-19 ari ngerekai mayuh agi ditu.
“Ambika chunto, bisi sekeda sida ke begaji hari nyau putus pengawa lalu ke bukai nya nadai ulih nurun ngiga belanja ketegal ngasika atur enggau nyaga pengelikun diri empu,” ku iya ba sebengkah penerang berita kemari.
Berebak enggau nya Nurhanim ngarapka mensia mayuh semampai ngasika atur ngambi penusah ke nuntung menua jam ke diatu ulih diputar enggau jampat.
Kerejasama rat ari semua raban beguna amat nentuka tuju enggau juluk Opis Menteri Pengerai (KPM) enggau Komiti Penyangga Penusah Ngenyit (JPBN) Sarawak mukaska covid-19 ulih dijapai.
Sama datai ba pengawa nyuaka bantu nya Chairperson PKN Parlimen Miri, Korina Mang enggau Chairpersons PKN Parlimen Sibu, Nurul Syafiza ke alai bantu udah disua ngagai pengari Sepital Sibu, Hamidah Khushi Mohd.
Korina ngasika sida sebuat nibarka jaku lalau ngagai mensia mayuh ngambi semampai meri kerejasama, abis nadai diau jenuu di rumah enti nadai pengawa ke berat di luar.
“Anang guai mindah ke bukai dulu mih kandang diatu enti nadai kebuah berat laban kitai deka ngerintaska rantai covid-19 tu ngambi badu ngerekai.
“Kitai endang patut besaup enggau raban gawa di luan mutarka penusah tu pulaika pemaik semua kitai,” ku Korina ngelalau.

Suara Sarawak