Polis nyidi sapa 'Jenifer Lawrence'

PADAWAN: Polis diatu benung chakah nyidi pemenggi akaun facebook (FB) benama Jenifer Lawrence pengudah laman facebook nya nyadung penerang bula pasal kes Covid-19 di Sarawak, ensana.
Dulu ari nya, facebook nya nyadung penerang bula ti madahka ‘321 kes positif dalam Sarawak sehari tu’ ba Facebook Sarawak Covid-19 Awereness Group lalu dikerembai ngagai whatsapp tim Covid Malaysia.
Ketuai Polis Pelilih Menua Padawan Supt Aidil Bolhassan ngenuku ke pekara nya lalu madahka piak sida bisi nerima ripot pasal pekara tu ari mensia mayuh sentang insiden nya urung pukul 7.15 malam.
“Pansik madahka pengempu facebook nya udu ngerembaika penerang pasal isu Covid-19 dalam Jaku Melayu, Jaku English enggau Jaku Mandarin.
“Taja pia, semua penerang nya udah dipadamka pukul 6 lemai ari orang ti ngempu facebook nya,” ku iya.
Iya nyemetak madahka pansik ungkup ngiga orang tu benung chakah dipejalai pengudah ngeluarka penerang fakta bula sereta ngasuh mensia mayuh begau.
“Kes dipansik nitihka seksyen 505 (b) Kanun Keseksaan laban ngasuh takut tauka ngemegauka mensia mayuh.
“Kes tu mega dipansik nitihka Seksyen 233 Akta Komunikasi dan Multimedia 1988,” ku iya.
Enti dikenuku salah orang nya tau diukum jil dua taun tauka diukum tauka kededua nya sekali.

Suara Sarawak