BINTULU: Polis DiRaja Malaysia (PDRM) Bintulu deka suah agi bejalaika pengawa matau enggau nginau ba endur ti berisiko bah berindik ari gaya hari ti enda tentu ba sekeda endur di Bintulu enggau Sebauh.
Tuai Polis Pelilih Bintulu, Superintenden Nixon Joshua Ali madah, raban sida ngerah sekeda tim matau endur ti dipasuk ba rintai chelum bah nyengkaum di genturung pendiau, jalai besai enggau endur baruh ti berisiko ampuh.
“PDRM seruran nyikap diri sebarang maya mantu mindahka peranak ti ampuh kelimpah nentu pengelanchar arus trafik enggau pengelikun mensia mayuh di genturung bekaul.
“Pia mega, polis deka nambah pengawa nginau pengelikun ngelingi PPS dikena nagang sebarang kes penyalah kelimpah nentu raban tasah likun diau di PPS,” ku iya.
Nixon bejaku munyi nya rambau ngabas sekeda PPS di Bintulu enggau Sebauh ditu kemari.
Iya nyemetak madah, PDRM deka terus bekerejasama rat enggau Raban Penyaga Orang Periman Malaysia (APM), Opis Bomba enggau Penyah Penusah Malaysia (JBPM) enggau Opis Pengintu Pengelantang Komuniti (JKM) dikena nentu pengawa ngatur PPS lanchar.
Ngenang silik, ku iya, gaya bah di Bintulu naka diatu (naka berita tu ditulis) agi ba tikas ulih dijaga tang gaya bah di Sebauh raya agi lalu raban penyelamat chakah bejalaika pengawa mindah peranak ngagai endur ti likun agi.
Nya alai, mensia mayuh dilalau nitih ke atur raban bekuasa lalu enda pulai ke rumah sida ti agi ampuh kelimpah seruran nitih penerang gaya hari enggau tikas ai pemadu baru ari raban bekuasa sebarang maya.
