KUCHING: Gerempung Pengajar Bumiputera Sarawak (KGBS) nyukung inisiatif perintah nungkap baru sistem nyerenih pelajar, ku Presiden KGBS, Zulkiflee Sebli.

Iya madah, inisiatif nya mandang ulah tebuka Opis Menteri Pelajar Malaysia (KPM) ba pengawa nungkap polisi pelajar bepelasarka guna kemaya hari sereta buah penemu mayuh raban nyengkaum apai indai enggau komuniti.

Ku iya nyemetak, sebarang pengawa nungkap enggau pemutus bekaul sistem nyerenih nasional patut dipejalai nengah randau penuh sereta lurus enggau gerempung pengajar, raban pengajar di sekula, apai indai enggau raban bekaul ti bukai.

“Pia mega, penemu enggau peneleba ti amat bala pengajar di bilik kelas patut nyadi pugu besai ngelanggur kuing nyerenih menua,” ku iya lebuh dirandau pemberita.

Tampung iya, KGBS ngaku sistem nyerenih ukai semina perengka nyerenih akademik tang bela meri empas ngagai tating pangku pengawa pengajar, seruga emosyen nembiak sereta pelasar ngajar enggau ngajar di sekula.

“Nya alai, pansik sekali tu patut nungkap penuh empas timpuh pandak enggau panjai nyengkaum penyikap sekula, latih pengajar, pengelantang nembiak sereta seriris enggau aspirasyen pelajar meruan.

“Nyema perambu mulaika baru Pentaksiran Tingkatan Tiga (PT3) enggau Ujian Pencapaian Sekolah Rendah (UPSR) ditungkap, kami ngerah siti mekanisma bejalaika polisi nya ti sebela enggau asi agi sereta siru ke sekula ditumbuh ngambi enda nandu pengelemi sistem peresa ti kelalu bepelasarka peresa aja,” ku iya.

Zulkiflee madah, KGBS chakah bekerejasama enggau KPM sereta semua raban bekaul dikena nentu polisi pelajar ti ditengkebang amat bepelasarka guna nembiak, pengelantang pengajar enggau kualiti pelajar menua chara penuh kelebih agi ba sukut Sarawak.

Dulu ari nya, KPM madah, opis menteri sida deka nungkap baru guna mulaika baru UPSR enggau PT3. Nya alai, KPM numbuhka baru Kaunsil Penyanding Penemu Pelajar Nasional (MPPK) ungkup bejalaika pansik pasal pekara nya ba taun tu.

Menteri KPM, Fadhlina Sidek madah, pemutus nya digaga pengudah betati ke sebana bala apai indai berindik ari pengawa madamka UPSR enggau PT3 ba taun 2021 enggau 2022.

Ku iya, ripot pansik MPPK enggau asil ripot bekaul mega deka dipejurai ngagai Raban Menteri ungkup atur bukai.