TEBEDU: Pengawa ngena Pom K1 ungkup ngenuku produk deka berengkah diterit 1 Mei tu disadang neritka agi pengawa meresa aktiviti dagang adan entara Malaysia enggau Indonesia.
Pekara nya dipadah rambau aum dagang entara Malaysia-Indonesia ti diatur ditu, baru-baru ini. Aum nya betuai ke Pegawai Opis Pelilih Tebedu, Gerard George Entigar ti dipasuk mayuh ejensi nerit adat ari Malaysia enggau Entikong, Indonesia.
Pekara dikemerat bekaul pengawa nitih atur import enggau eksport kelebih agi produk betanam betupi baka dagin, ikan, sayur enggau buah.
Berengkah ari haribulan nya, semua aktiviti dagang nengah Kompleks Imigresyen, Kastam, Kuarantin enggau Pengelikun (ICQS) meseti ngena Pom K1. Nya alai, pedagang dilalau nyiri ejen di ICQS Entikong ngambi pekara dokumentasyen meraka adan lanchar.
Notis bekaul nerit atur baru nya deka dipandang ba ICQS Tebedu enggau genturung Kalimantan Barat (Kalbar), Indonesia dikena nentuka penerang nya datai ba semua raban bekaul.
Pia mega, sukut pengelikun pemakai bela diberi perati. Pengari Opis Pengerai Bagi Menua Serian, Ambrose Jude Jimbau nyemetak madah, tetiap produk pemakai ti tama menua tu patut nitih ke standard pengerai ditetap lalu sebarang produk ti puntan nitih atur operasyen standard (SOP) deka ditulak tekala nya ba pintu penama adan.
Nangkan nya, Opis Servis Kuarantin enggau Meresa Malaysia madah, produk betanam betupi ba penyampau mayuh patut nengah sistem e-permit tang enti mimit agi ulih diatur chara manual ba kaunter meresa.
Aum nya bela nerang bida entara Aktiviti Meraka Adan (BCA) ti ngaul pengawa mindah ba radius kurang lima kilometer enggau Aktiviti Dagang Adan (BTA) ti ngaul dagang meraka adan chara rasmi. – EDISI UKAS
