KUCHING: Bemacham Kereban Nyaga Diri (PPE) dibeli ari Shanghai, China ungkup raban gawa ba luan udah datai ditu pagi tadi.

Ku Menteri Kaunsil Kandang Menua enggau Pengawa Berumah Datuk Sri Dr Sim Kui Hian, semua PPE nya datai ba MAS Kargo, Padang Bilun Entarabansa Kuching (LTAK) ditu urung pukul 3 pagi ngena penerebai khas kedua ari Shanghai.

Entara PPE nya iya nya 5,000 baju perubat sekali kena, 100,000 sengkabung mua, 5,000 penutup but perubat, 184,000 penutup kasut, 184,000 gari isolasyen, 184,000 selapuk indu misi, 184,000 selayah enggau 60,000 sengkabung mua N95.

“PPE keterubah dibeli kena 9 April, diudar Opis Pengerai Nengeri Sarawak (JKNS) tang dibayar Perintah Sarawak laban kami endang begunaka PPE nya diatu.

“PPE renggat kedua ke datai kemari nya mega diudar JKNS enggau pemendar sereta dibayar Opis Menteri Pengerai (KKM). Kami benasip laban KKM ngemendarka penerebai khas mai PPE berega bejuta ringgit,” terang iya.

Kui Hian mansutka jaku nya lebuh dirandau pemberita rambau pengawa nyuaka PPE ba MAS Kargo LTAK disempulang Direktor Pengerai Sarawak, Dr Chin Zin Hing, ditu tadi.