KUCHING: Penyampau Palan Pengenduh (PPS) di Sarawak nambah ngagai 40 iti naka pukul 4 lemai kemari, berindik ari pengawa muka sekeda PPS baru dikena ngengkah penyampau tubuh orang ti tasah bah ba sekeda endur di nengeri tu.
Nitih ke ripot Komiti Penyangga Penusah Nengeri (JPBN) Sarawak, bisi 888 Tuai Ruang Bilik (KIR) ti ngaul 3,019 peranak diatu ngenduh ba semua PPS ti beoperasyen tang trend mindah diripot majak kurang.
Di bagi menua Kuching, PPS Surau Nur Hidayah Batu Kitang Jaya agi beoperasyen ungkup 22 KIR seraya dua PPS di Kampung Bijuray Mongag enggau Kampung Blimbin Krokong, Bau ditutup urung pukul 2 ngalih hari.
Seraya di bagi menua Samarahan, sekeda PPS mengkang beoperasyen nyengkaum PPS SK Endap, Balai Suarah, Balai Lenggai Kampung Entingan enggau Balai Raya Kampung Nangka.
PPS Balai Mesra Simunjan dirikod bisi nambah tang PPS Balai Mensia Mayuh Gedong diperati majak kurang.
Lalu di bagi menua Serian, PPS di pelilih Siburan, Serian, Balai Ringin enggau Tebedu terus nyadi palan endur raban tasah bah ngenduh.
Sekeda PPS ti ngerikod penambah ba bagi menua tu iya nya PPS SK Tanah Merah, PPS Balai SK Tebekang, Balai Ranchan, SK Pangkalan Sorah enggau PPS SK Krusen.
Di bagi menua Sibu, semina siti aja PPS agi beoperasyen iya nya Balai Kampung Jeriah ti endur dua KIR ngaul tujuh peranak.
Berebak enggau nya, di bagi menua Mukah, PPS Balai James, Sebaya Atas, Sungai Baoh Burak di Dalat dirikod nambah ngaul 55 KIR ti mungkur 198 peranak.
Nangkan nya, di bagi menua Bintulu, PPS Balai Suarah Bintulu enggau PPS Balai Raya Sebauh ba penyampau peranak ti ngenduh dia bela bisi nambah.
Seraya di bagi menua Miri, tiga PPS agi beoperasyen nyengkaum PPS Balai Pujut Tanjung Batu, PPS Masjid Darul Iman Kampung Tudan Fasa 2A enggau PPS Balai Palan Komuniti Tudan Fasa 4.
Semua ejensi bekaul nyengkaum Raban Penyaga Orang Periman (APM) Sarawak terus matau gaya bah sereta ngatur PPS dikena nentuka pengelantang enggau pengelikun rayat terus dijaga.
