SARIKEI: Lebih 500 peranak ngelingi tu ngerichahka agi Program Fun Walk serimbai pengawa ngintu Hari Baruh Karbon ditu, kemari.

Program ti diatur Kaunsil Pelilih Sarikei (MDS) nya mungkur pejalai tiga kilometer penyauh berengkah ari Jalai Sentral, Wharf, Repok, Sang Lee, Getah, Bersatu enggau Nyelong.

Pengawa ngatur program tu iya nya siti inisiatif beguna dikena meri penyedar ngagai komuniti pasal pangku pengawa sida ba pengawa nyapai visyen Strategi Pemansang Pengudah COVID-19 (PCDS) 2030.

Nya alai, Sapit Menteri Pengeraja Asal enggau Pemeruan Rampa Menua, Datuk Seri Huang Tiong Sii madah, program nya dikena nambah penyedar pasal pemesai guna ngurang pengawa mansutka karbon dioksida enggau ngamahka rampa menua.

“Kitai mega deka ngelakuka gaya idup bepengerai enggau semengat penyerakup komuniti pupu bansa,” ku iya.

Iya madah, nengah PCDS 2030, perintah deka ngurang pengawa mansutka karbon dioksida nengah pelasar siruka rampa menua dikena nyaga pemeruan rampa menua ungkup rebak dudi.