Program ‘Jelajah Belia’: Peluang ngerembaika pengelandik

TARAT: Urung 500 iku nembiak pelilih Tarat nyereta program ‘Jelajah Belia’ ke diatur ba Dewan Kampung Tarat Melawi apin lama ke udah.

Program diatur Opis Menteri Nembiak enggau Lumba Sarawak nya dipenyadi Kaban Kunsil Nengeri (Adun) Tarat, Datuk Roland Sagah Wee Inn.

Bela bisi datai Pemangku Sekretari Mendam Opis Menteri Nembiak enggau Lumba Sarawak Nancy Jolhi.

“Tuju program tu dikena narit penatai raban nembiak enggau gerempung dalam program ke diatur perintah laban beratika pemesai guna pengelantang raban nembiak.

“Kitai deka ngangkat, ngansah enggau meri peluang ngagai nembiak ditu ngerembaika penau sida,” ku Roland.

Kenu ku Roland program tu dikena nempa semangat nembiak awak terus regas, ngembuan tanggungpengawa, ulih nyadi ketuai, bisi tanggungpengawa, nyereta gerempung, bisi batang pengawa, rindu nyadi volunteer enggau ngembuan penaluk ke menua.

Tandu iya, program nya mega sebengkah ari pengawa perintah dikena nempa kaul enggau raban nembiak ba serata nengeri Sarawak laban mayuh program udah ditusun.

Entara aktiviti ke bisi diatur iya nya Randau Nembiak begulai enggau Adun Tarat, peransang pengidup, aktiviti lumba enggau main asal, pekit “Belia Got Talent” , panggau pemerindang enggau mayuh agi ke bukai.