KUCHING: Program Niki Ke Tambai Ibu Pertiwi kemari ukai semina program ninting bulan tang diatur serimbai mantar Gawai ti mantai budaya enggau semangat taluk ke menua ba komuniti Sarawak.
Program renggat bulan Mei ti diatur Dewan Bandaraya Kuching Utara (DBKU) nya berengkah diatur pukul 8 pagi di Pelaman Ibu Pertiwi sereta dipenyadi Menteri ba Opis Premier Sarawak, Datuk Seri John Sikie Tayai.
Pengawa Pasukan Kawalan Kehormatan DBKU nyadi aktiviti keterubah dikena ngepun program nya lalu mensia mayuh bediri nyadaka lagu Ibu Pertiwi.
Nipak ke semangat Gawai, pemerindang tanda asal ari Gerempung Main Asal Dayak ti mandang elemen budaya Dayak kelimpah ngerichahka agi program nya sereta negap pengelala rayat pupu bansa.
Pia mega, Tambai Ibu Pertiwi 25 meter (m) pemanjai enggau 12.4 m pemesai nya ditiki enggau adat basa ninting Hari Minggu keterubah ninting bulan ba tiang tambai ikonik Kuching 99.4 m peninggi ti nyadi siti ari kelai besai di mengeri tu.
Ungkup bulan April tu tadi, Menteri Utiliti enggau Telekomunikasyen, Datuk Seri Julaihi Narawi diberi basa bejadi program nya serimbai pengerami Hari Raya Aidilfitri.
Kenyau dibantai Julai 2024, inisiatif ninting bulan nya terus nyadi pelasar ti besai reti ba DBKU narak semangat sayau ke nengeri tu enggau semangat penyerakup ba komuniti nadai ngira penatai.
Naka diatu, program nya udah dipenyadi sekeda tuai besai nengeri baka Premier Sarawak, Datuk Patinggi Tan Sri Abang Johari Tun Openg kena 28 Julai 2024 lalu dientudi ke Sapit Premier Sarawak, Datuk Amar Douglas Uggah Embas kena 9 September 2024.
Sapit Premier Sarawak, Datuk Amar Dr. Sim Kui Hian bejadi program nya kena 6 Oktober 2024 lalu ditangkan Sapit Premier Sarawak, Datuk Amar Awang Tengah Ali Hasan kena 19 November 2024 sereta Menteri Dagang Temuai, Industri Kreatif enggau Seni Pemerindang Sarawak, Datuk Seri Abdul Karim Rahman Hamzah kena 25 Januari 2025.
Laban ti nyadi kelai ti ngemegahka rayat, tiang tambai Ibu Pertiwi nya dirikod ba Malaysia Book of Records (MBOR) nyadi tiang tambai pemadu tinggi di Asia Tenggara enggau Malaysia.
Sapit Menteri di Opis Premier Sarawak (Penyeraris Projek ungkup Ejensi Pemansang Kandang Menua, DBKU enggau Pekara Islam), Datuk Dr Abdul Rahman Junaidi, Datuk Bandar Kuching Utara, Datuk Hilmy Othman, Tuai Rejister Kort Bumiputera Sarawak, Datuk Jonathan Lugoh, Presiden Kort Bumiputera Sarawak, Gabriel Gumis, Direktor DBKU, Ramzi Abdillah sereta Sekretari Kaunsil Adat Istiadat Sarawak, Marcos Sibong mega bisi datai ba pengawa nya.
