KUCHING: Penyedar komuniti pasal pemesai guna nyaga rampa menua patut ditambah sebarang maya.

Inisiatif nuju pekara nya patut mungkur bemacham sukut dikena nyeliah pengawa ngamahka rampa menua ti ulih ngeruga pengidup mensia ketegal ulah ti enda beradat komuniti MADANI.

Ketegal siru enggau pekara nya, serikat lokal Timuran Kembangan Sdn Bhd nerus inisiatif ngumpul barang ti ulih dikena baru nengah Program Pemungkal Ngena Baru di genturung Rumah Prima, Jalai Daya ditu.

Direktor Pekara Timuran Kembangan Sdn Bhd, Johnny Ting Su King madah, program nya diatur nengah kerejasama Majlis Bandaraya Kuching Selatan (MBKS) berengkah ari minggu nyin kemari.

“Pekara ti diberi perati kitai iya nya ngemujurka program tu ngagai peranak ti diau di genturung pendiau taman berumah dulu.

“Kami temegah laban timbal ari mensia mayuh chukup manah lalu inisiatif betampung kitai tu ukai semina ulih meri penyedar ngagai komuniti tang ulih nyeliah rampa menua ari kamah,” ku iya rambau aum pemberita ditu, kemari.

Iya madah, timbal ari peranak dia chukup manah lalu mayuh barang udah dikena diterima ari sida lalu nya ngelai sida sedar pasal pekara nya.