KUCHING: Kereja nyeliti Jalai Matang Baru Renggat 2 udah manggai 15.2 peratus lalu disadang tembu Mei 2025.
Sapit Menteri Infrastruktur enggau Pemansang Penyangkai Kapal, Datuk Ir Aidel Lariwoo madah, projek nyeleti jalai sepemanjai 4.4 kilometer (km) nya belabuh ari Matang Jaya ke Jalai Matang/Jalai Batu Kawa-Simpang Matang.
Ku iya, projek ngaga jalai alun begembar empat arung nya mega begunaka belanja sepenyampau RM54.59 juta.
“Projek tu kala nyadi buah randau orang suba ketegal kunteriktor asal diketu kunterik laban enda tetembuka projek lalu ditinda baru ngagai kunteriktor baru.
“Kitai beratika kunteriktor ke diatu (Mirecont Sdn Bhd) naka ulih nembuka projek tu lalu pengawa udah manggai 15.2 peratus dibanding taga asal 16.1 peratus,” ku iya.
Aidel mansutka jaku nya lebuh dirandau pemberita maya ngatur pejalai gawa meda status pemadu baru projek Jalai Baru Matang Renggat 2, ditu tadi.
Iya madah, taja projek nya laun mimit tembu laban ari perati ke diatu, iya andalka kunteriktor deka jampat agi ari taga ditetap.
