KUCHING: Perambu projek jalai penyambung Miri-Marudi, Marudi-Mulu (Long Melinau) enggau Long Panai-Long Lama (MMMLL) agi ba renggat dokumentasyen tinda naka diatu.
Sapit Menteri Infrastruktur enggau Pemansang Penyangkai Kapal (Pemansang Infrastruktur) Datuk Ir Aidel Lariwoo madah, projek nya mega deka dipejalai Kaunsil Pemansang Koridor Wilayah (RECODA).
“Nya kebuah, projek tu diselinting ngambi ditinda ba suku keterubah 2025 lalu pengawa nya disadang belabuh suku ketiga taun ti sebaka. Kitai mega ngadang projek tu tembu suku ketiga 2029,” ku iya.
Aidel mansutka jaku nya lebuh nyaut tanya Kaban Kunsil Nengeri (ADUN) Pujut, Adam Yii Siew Sang ngagai Opis Menteri Infrastruktur enggau Pemansang Penyangkai Kapal bekaul pejalai projek nya ba hari kedua Aum Kunsil Nengeri (DUN) Sarawak, ditu kemari.
Iya madah baru, projek nya mega deka mungkur ngaga enggau nyeleti urung 42 kilometer (km) jalai standard Opis Kereja Raya (JKR) R5 ari Eastwood Junction, Miri ngagai Marudi.
“Tu mungkur ngaga enggau nyeleti urung 100km jalai alun JKR R3 ari Marudi ngagai Kuala Melinau enggau Long Panai ngagai Long Lama, sereta ngaga 23 jematan,” terang iya.
Ba lansa sama, iya madahka anggar kos ungkup projek nya penyampau RM3.8 bilion.
Ungkup rikod, projek ti deka dipejalai dalam timpuh 48 bulan nya mungkur dua pakej ke alai Pakej 1 nya Miri ngagai Marudi (1A), Long Panai ngagai Long Lama (1B) penyauh 68km; enggau Pakej 2 ari Marudi ngagai Mulu penyauh 76km. – NUR HAZIRAH SHUKUR
