SRI AMAN: Kunteriktor dipinta nembuka projek nitih taga laban pemuntan ngereja nya ulih ngamah nama Perintah Sarawak enggau pengari rayat dia.

Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis madah, rayat suah nyalahka pengari rayat perintah lalu ukai kunteriktor enti Program Transfomasyen Menua Pesisir (RTP) bisi penanggul.

“Nya kebuah, beguna endar ejensi pengatur nentuka raban kunteriktor nembuka projek RTP ti diulih sida nengah atur lalu meseti tembu dipejalai nitih taga.

“Aku mega bisi ngabas kediri pejalai projek RTP nya nentuka kunteriktor ngeleda ke pengeran kitai deka projek nya tembu enggau diasai ke rayat,” ku iya.

Harden madah munyi nya lebuh bejadi Pengerami Ngiling Bidai enggau Bejadi Projek RTP Kunsil Nengeri (DUN) Simanggang, ditu ensanus.

Kaban Kunsil Nengeri (ADUN) Simanggang nya lebuh bejaku mega ngingatka raban kunteriktor semampai nyaga nama kompeni sida.

Ku iya nyemetak, pemuntan nembuka projek RTP nitih taga ti ditetapka engka ulih ngasuh sida diterit atur bukai nitih ke atur kunterik nya.

“Nya kebuah, seliah ke mih penanggul nembuka projek RTP nitih taga enti enggai nama kompeni kita bisi penanggul,” ku iya.

Ba pengerami nya, iya mega bisi nyua chek Projek Mit Pemansang Menua Pesisir (MRP) sepenyampau RM44,000 ngagai 10 Komiti Pemansang enggau Pengelikun Genturung Pendiau (JKKK) sereta gerempung indu di DUN Simanggang.

Penerima nya nyengkaum ari JKKK Klassen Simpang, Undop, JKKK sereta Gerempung Indu Nanga Klassen Sekula, JKKK Nanga Klassen, Gerempung Indu Rumah Story, JKKK Entawa Undop, Gerempung Indu Kampung Bayai Baru, JKKK Ibol Sungai Raya, Undop, Kampung Sungai Putong enggau JKKK Radau. – EDISI UKAS