Projek ‘quick-wins’ entara produk dagang temuai baru

KOTA SAMARAHAN: Komiti Mit Pemansang Dagang Temuai dibaruh Ejensi Pemansang Zon Besepadu Samarahan (IRSDA) entara komiti ti deka ngemansangka sitak Kota Samarahan nengah chara numbuhka produk dagang temuai baru ba Sarawak.

Menteri Dagang Temuai, Seni enggau Main Asal (Motac) Datuk Sri Nancy Shukri madahka entara projek ‘quick-wins’ tu dikemendarka ejensi tu iya nya Projek Samarahan Boulevard enggau Projek Taman Tasik Desa Ilmu.

“Kelimpah ari nya, sekeda projek baru ti deka digaga ba baruh IRSDA iya nya Projek Tanam Sanktuari Herba Borneo Bagi Menua Samarahan, Projek Dagang Temuai Lumba, Projek Apps Samarahan Viral, Projek Tamu genturung Kota Samarahan enggau Perambu Palan Bemalam sereta Chalet di Ladang Nanas, Kota Samarahan.

“Aku ngarapka, pekara tu ulih nyadi peransang ngagai orang bukai ngaul mayuh agi produk dagang temuai bukai awakka ulih nambahka penatai pemisi,” ku iya.

 Nancy bejaku munyi nya rambau bejadika Pekit Dota 2 Renggat Keterubah, Serba Dinamik di Dvirtual Park ditu, kemari.

Ku iya, diatu mensia mayuh patut disikap ngelala produk baru ti ulih narit ati temuai luar baka aktiviti meda baya di sungai ti ulih narit mayuh agi orang deka meda jelu nya.

“Nya alai kitai semua patut ngembuan tanggungpengawa ngerembaika pekara tu nyengkaum nyendiaka jalai alun ti manah, bank enggau palan makai.

“Mensia mayuh patut madah ngagai kaunsil kandang menua nyema bisi nemu palan ke bedau ngembuan perengkaguna ti meruan,” ku iya.

Iya mega andalka, mensia mayuh patut nyereta Program Imunisasyen Nasional Malaysia tauka ngerejister ba Aplikasyen MySejahtera ngambika ulih divaksin awakka industri dagang temuai di menua tu jampat suman.

Suara Sarawak