SARIKEI: Projek dipejalai nengah Program Transformasyen Menua Pesisir (RTP) 2025 mandangka perintah ransing negap infrastruktur pemun ba menua pesisir, kelebih agi ba rumah panjai di Sarikei.
Sapit Menteri Kebun Dandang Besai enggau Komoditi, Dato’ Sri Huang Tiong Sii madah, tiga rumah panjai di Sarikei diberi projek RTP ngaul pengawa nyeruri jalai, ngaga jalai semin enggau ngelasi parit ti meri pemaik ngagai 38 pintu bilik.
Ku iya, perengkaguna pemun ti meruan beguna endar dikena nambah pengelantang peranak menua pesisir sereta nentuka pejalai, pengelikun enggau ekonomi menua dia lanchar.
“Projek RTP dipejalai tu mandangka perintah seruran naka ulih nentuka pemansang menua pesisir diadu inklusif enggau sebela,” ku iya.
Dulu ari nya, Dato’ Sri Huang diari ke Wong Soon Mee disempulang Penulung Injinia Kaunsil Pelilih Meradong enggau Julau, Churchill ngatur pejalai ngabas taba ke rumah panjai nya kena Hari Dua ngambi meda endur nya, ninga timbal penemu peranak menua sereta ngemata pengawa nyerah taba projek.
Rumah panjai ti deka digaga jalai semin iya nya Rumah Murieng Kri, Ulu Bakong, Kutak enggau Rumah Bagong Usah, Batu 6 Jalai KJD.
Kelimpah ari nya, Rumah Lawi Chong, Batu 5 Jalai KJD, Bintangor deka nerima projek ngelasi parit enggau laman rumah panjai nyengkaum palan engkah entukar digaga manah agi.
Ku iya, projek nya dikeandal ulih nambah tikas pengelikun, lantang ngadu penusah enggau pengawa peranak ngangkut asil kebun lanchar agi. – EDISI UKAS
