PVKTR ngabas Bujang Berani di Nanga Skrang

KUCHING: Bujang Berani, Datuk Sarjan (B) Awang Raweng dikearap meruan gerai sereta lantang neruska pengidup, pia ku sampi raban Gerempung Veteran Soldadu Kor Renjer (PVTKR) ti ngabas iya kena 2 Mac tu tadi.

Nitihka penerang ari Biro Pengelantang Pendiau PVTKR sida bisi ngabas Bujang Berani tu di Nanga Skrang, Sri Aman seraya nyuaka bantu perengka perubat, katil sereta tilam.

“Arapka pemeri tu tau meri iya (Datuk Awang) pengelantang endur iya belelak.

“Pia mega kami besampika iya meruan gerai laban diatu iya nyau enda tentu dapat,” ku penerang nya.

Pejalai raban PVTKR betuaika Keliment Nyapong lalu disempulang pengari Direktor Opis Pekara Veteran (JHEV) Sarawak Lt kol Dunging Serit.

Datuk Sarjan (B) Awang Raweng

Ngelansa pejalai pengidup iya, Awang Raweng kala gawa nyadi Iban Scout lalu diengkah ba Platun Ke-10 Kompeni D, 1 Batalion Rejimen Worcestershire.

Maya nya, iya begulai enggau platun betubuh 20 iku diberi tanggungpengawa matau kandang kampung Kluang, Johor urung pukul 9.50 kena 27 Mei 1951, enda memukai sida diserang ngenyit seraban 50 iku komunis.

Ba penyadi nya, sekeda soldady British mati lalu maya nyelamatka prebet G. Hughes ke udah kena timbak, dia Awang Raweng bakal kena timbak ba pah enggau lengan.

Berekat pemerani iya, Awang Raweng kala diberi nerima basa ke pemadu besai iya nerima Anugerah Midul George Cross ari Perintah United Kingdom kena 20 November 1951.

Kelimpah nya, iya mega nerima midul jubli perak, emas enggau berlian beserimbai enggau Pengerami Besai Nyiri Ratu Elizabeth II.

Di Malaysia, Awang Raweng kala nerima Pingat Jasa Malaysia enggau Ijazah Sarjana Kehormat Pengajian Strategik ari Universiti Pertahanan Nasional.

Udah nya, Perintah Nengeri Sarawak enda tinggal meri basa ngagai Awang Raweng beserimbai enggau pengerami Hari Pengada Ke-82 Tuai Pemegai Menua Tun Pehin Sri Abdul Taib Mahmud kena 13 Oktober 2018 dia iya diberi Pinggat Panglima Setia Bintang Sarawak ke ngujungka iya bulih gelar Datuk.

ARAPKA MERUAN GERAI…Datuk Sarjan (B) Awang Raweng (duduk) nerima pemeri ari Lt Kol Dunging Serit sereta dikemata raban PVTKR ke bukai rambau pejalai ngabas iya kena 2 Mac tu tadi.

Suara Sarawak