DARO: Perintah ngaku pangku pengawa besai raban indu menua pesisir nyadi penyungkak pemansang sosioekonomi menua ukai semina ngagai ruang bilik aja tang nyadi bakih strategik ba pemansang komuniti ba renggat baruh.
Kaban Kunsil Nengeri (ADUN) Daro, Dr Safiee Ahmad madah, jasa raban indu chukup besai ba mayuh pengawa nyengkaum nyadi tuai komuniti, dagang, pelajar enggau pengelantang sosial kelebih agi di pelilih Daro.
Iya madah, sida entara raban ti pemadu regas mantu ngemujur bemacham aktiviti enggau program pemansang komuniti di renggat lokal.
“Pengawa raban indu ngambi bagi ba Gerempung Pemansang Indu Sarawak (PPWS) Pampang Daro nyengala mandang komitmen tinggi sida ba pemansang menua pesisir.
“PPWS Daro patut terus ngesan pangku pengawa nyadi pelasar besai negap raban indu ba pengawa nyadi tuai, dagang, pelajar enggau pengintu pengelantang seriris enggau guna kemaya hari,” ku iya.
Safiee bejaku munyi nya ba Pengerami Makai Lemai Bollywood ti diatur PPWS Daro ditu, malam kemari.
Iya madah, PPWS ukai semina nyadi pelasar ngempuru raban indu tang nyadi pelasar negap pengelandik enggau pengulih sida.
Ku iya nyemetak, PPWS enggau gerempung ukai dikuasa perintah (NGO) indu ti bukai beguna amat dikena ngerembai kerejasama enggau ejensi perintah sereta gerempung bekaul.
“Kerejasama strategik nya beguna amat dikena nentu perambu enggau pejalai program ulih digaga enggau ngasi. “Genap inisiatif patut meri pemaik ti nyengala ngagai komuniti kelebih agi ba pengawa ngangkat tikas pengidup raban indu enggau ruang bilik di menua pesisir,” ku iya.
Iya mega meri terima kasih ngagai semua NGO di Daro berindik ari sukung enggau jasa betampung sida ngagai pemansang pelilih nya.
Terang iya, semangat kerejasama ti dipandang patut ditampung dikena nentu pemansang ti inklusif enggau meruan.
Ungkup sukung betampung, Safiee meri agih belanja sepenyampau RM28,000 ngagai tujuh pampang PPWS di Daro ungkup ngatur aktiviti ti diperambu sida.
Pia mega, iya bisi meri agih belanja tambah sepenyampau RM5,000 dikena nangkup ungkus ngatur pengerami nya.
