PENYARIH tabuh nyau berauh munyi pangka pasang benak didinga ari panggau besai Borneo Dayak Cultural Festival (BDCF) 2026 matak perati beribu pengusung datai malam nya.

Nya mih tabuh ditebah raban ke ngelar diri Raban Terang Pegari ti mantaika inovasyen chara tauka gaya baru betabuh bebala mayuh ke dikumbai sida Orchestra Tabuh.

Raban ti diembing pengajar Peni Nyanggai nya temegah ati ulih mantaika pemerindang ngena kereban muzik asal ngading main asal raban bansa Iban ba panggau budaya Dayak.

Sida ngempung kereban muzik asal Iban dikumbai Belikan enggau kereban tabuh baka tawak, engkerumung, bebendai enggau gendang ke ditebah 30 iku nembiak seretai.

Orchestra Tabuh nya digembar enggau Pantun Iban sereta Ajat Iban ngemai inovasyen ba tabuh asal ke ngelama tu ditebah berapa iku aja ba siti-siti awak.

Ku Pengajar Peni, raban  sida mantaika pemerindang dikumbai Orchestra Tabuh ti keterubah dibantai ba panggau besai BDCF 2026 di Dataran Tun Tuanku Bujang, Sibu serimbai pengerami bejadi, ke diatur kena 8 September tu tadi.

“Kami kebendar deka mandangka pengulih enggau asil bala nembiak ke belajar dalam kelas subjek Jaku Iban lalu dibantaika ba panggau besai BDCF.

“Raban Terang Pegari mujur mantaika inovasyen chara tauka gaya baru betabuh iya nya betabuh bebala mayuh ke dikumbai kami Orchestra Tabuh,” ku iya ngepunka randau.

PEMUTAR KREATIF

Pengajar Peni madah, pengawa betabuh bebala mayuh nya ditibak ari runding iya empu bepun ari siti penanggul dalam kelas ke ngembuan mayuh nembiak.

Ku iya, maya ngajar subjek Jaku Iban ungkup nembiak Pom 4 ngaul topik Adat Basa Ngelaluka Temuai, dia iya beratika maya betabuh ngena chara lama semina empat iku nembiak aja ke ulih ngambi bagi ba siti-siti awak.

“Aku teulihka runding betabuh bebala mayuh tu bepun ari siti penanggul dalam kelas ke ngembuan mayuh nembiak, entara 40 ngagai 48 iku nembiak dalam siti kelas.

“Maya ke ngajar subjek Jaku Iban Pom 4, ngaul topik Adat Basa Ngelaluka Temuai, dia aku meratika maya betabuh ngena chara selama, semina empat iku aja nembiak ulih ngambi bagi.

“Bala nembiak bukai nyau nadai peluang belajar tauka ngujika penau sereta pengelandik diri nebah kereban muzik asal Iban tu.

Nyau bisi ati sinu meda sida.

“Ari nya tadi, aku lalu ngasuh sida nguji ngena mayuh agi kereban baka dua iti gendang, dua lebuan tawak enggau dua lebuan bebendai enggau dua set engkerumung lalu pengawa nya dipeda aku mujur,” ku iya mulaika pengingat diri.

Pengajar Peni udah nya mai semua kereban tabuh dikemisi iya lalu ngasuh bala nembiak bela mai kereban tabuh ke deka ditebah sida ngagai sekula.

Iya madah, ari pemujur pengawa sida sebuat dalam taun 2024, nya ke ngujungka iya ransing agi ati ngemanahka agi chara sida betabuh seraya nerenak pengangkun ke pesaka asal ngagai rebak biak.

“Aku pen lalu mai semua perengka tabuh dikemisi aku, lalu ngasuh nembiak mai kereban tabuh ke deka ditebah sida empu ke sekula.

“Pengawa nya dipeda aku mujur amat ba taun 2024 lalu nya ke ngujungka bala ransing ati ngemanahka agi chara kami betabuh.

“Tu mega ngasuh aku nyau terundingka siti nama baru iya nya Orchestra Tabuh ari Raban Terang Pegari,” terang iya bekaul ari ni nama raban sida nyumbuk.

MANTAI PENGELANDIK

Nampung baru randau, Pengajar Peni madahka pengelandik ke dibantai sida nya endang tulin pengelandik bala nembiak empu, nyengkaum nembiak ke nebah Belikan digembar enggau pengawa betabuh bebala mayuh.

Ku iya, Raban Terang Pegari diseridi angkunka main asal baka bepantun enggau ngajat sereta ditarak rindu mantaika mayuh macham bunyi tabuh dikembuan raban bansa majoriti ke nguan Tanah Kenyalang.

“Pengelandik ke dibantaika kami iya nya pengelandik nembiak nebah Belikan, betabuh bebala mayuh sereta mantaika mayuh macham bunyi tabuh.

“Ambika chunto baka tabuh selama, tabuh Batang Ai (Ayun Lundai), Tabuh Batang Rajang enggah tabuh dikena bekuntau.

“Kelimpah ari nya kami nepu mayuh agi elemen bukai ba pemerindang ari kami baka ngajat, bepantun, begendang iya nya bunyi Pelanduk Tinggang Batang enggau Betunggang.

“Lalu ba BDCF 2026 tu tadi, kami mantaika pemerindang tiga dalam satu, iya nya Pantun + Belikan + Tabuh,” ku iya bekunsi pejalai pengawa sida.

Pengajar Peni mega madahka diri temegah ati lebuh meda video sida balat dikerindu bala ke meda sebelah media rama, ke ngasuh sida netapka juluk ati deka ngemanahka agi chara betabuh.

MATIH NEMBIAK

Nyau ngenang pengawa Raban Terang Pegari ku Pengajar Peni, kelimpah ari dipatih betabuh enggau ngajat, bala nembiak mega dianjung ngulu kus nebah Belikan enggau belajar begendang sebedau sida merindang.

Iya madah, pengawa baka nya beguna endar ngambi bala nembiak disikap manah sereta sedia ari sukut runding enggau pengeregas tubuh ke chukup nitih pematut.

“Bala nembiak diembing aku endang dipatih betabuh enggau ngajat kelimpah dulu agi dianjung ngulu kus nebah Belikan enggau nempap gendang.

“Tu beguna endar laban ari penemu ke dipelajar dalam kelas enggau maya ngulu kus, nya ke deka ngansah penau sida ba main asal, lalu tu deka meri pengandal ati ngagai sida merindang ba mua mayuh.

“Kitai ke dikangau merindang atas panggau ukai semina mai nama Raban Terang Pegari aja, tang mega ngarika identiti, pesaka enggau budaya Iban ngagai mata mensia mayuh.

“Nya alai, ba penemu enggau runding aku, panggau baka BDCF tu nyadi siti pelasar ti chukup manah alai mantaika pengelandik bala nembiak rebak baru, kelebih agi ba main asal,” ku iya nyemetak.

SUKUNG APAI INDAI

Nambahka nya ku Pengajar Peni, bala nembiak dipeda gagit sereta gaga endar enti raban sida  bisi nerima kangau merindang lalu semua sida endang naka ulih nyikap diri.

“Maya bisi dikanggau merindang ari raban pengatur pengerami tauka program, bala nembiak gaga amat sereta gagit.

“Ari nya tadi, makin mayuh nembiak majak rindu ke main asal nyentukka sida minta dibelika apai indai kereban dikena betabuh.

“Aku mega nyau ransing endar ati ngembing sida tu laban mayuh amat nembiak deka tama raban kami lalu deka enggau kami sebuat betabuh,” ku iya tuchum gaga.

Pengajar Peni madah baru, sekumbang ngembing enggau ngatur bala nembiak, kelebih agi Raban Terang Pegari, iya meda sukung tegut ari apai indai.

Ku iya, komitmen tauka pengeransing ati apai indai patut dipuji laban nya mega pun pemujur bala anak sida mantaika pengelandik enggau penau diri baka dipeda diatu.

“Sepemanjai aku ke ngatur bala nembiak betabuh nyengkaum nebah belikan, ngajat enggau bepantun, aku meda komitmen enggau sukung tegut ari apai indai mega patut dipuji.

“Sida sanggup nganjung enggau ngambi anak nguluh latih tetiap lemai, melika anak sida kereban dikena betabuh.

“Utai ke balat negu ati aku, apai indai besaup enggau aku ngatur, ngulu enggau ngari anak  sida empu maya kami bisi dikangau merindang ba panggau.

“Aku nemu, semua pengawa tu ukai muntang laban begunaka awak enggau belanja, tang sida nadai bekira, nadai kala sebana, tang majak meri kerejasama.

“Tu ke ngasuh aku ngasaika pengelelak enggau pengiruh semua kami tebalas lebuh ninga tempap jari bala mayuh pengudah tembu merindang ba panggau,” ku iya.

PENGUJI NGASUH KERING

Baka ngemansangka pengawa bukai, ku Pengajar Peni, Raban Terang Pegari mega napi penguji enggau mayuh pemar sekumbang ditumbuh urung dua taun ke udah.

Entara penguji ditapi raban sida ku iya baka penanggul endur belatih laban sida tusah ngiga nalan ke engkeman ketegal enda ulih ngatur latih di sekula.

“Penanggul keterubah nya alai belatih.

Tusah bala kami deka ngiga alai belatih laban enda ulih ngatur latih ba sekula ketegal bisi nembiak belajar muakka pagi enggau lemai.

“Kami mega enda tau belatih ba rumah aku laban maya kami betabuh lalu dirara orang ragak.

Tang semua nya enda ngasuh kami mantul.

“Kami enggai disema orang  baka mang tubu apin dipanduk, pang kepayang dalam periuk, sereta enggai mega dipadah baka perau ngantaka pengkalan; ke mai reti enda tunggang ati ngereja pengawa.

“Kami naka ulih ngiga awak ke engkeman endur belatih ngambi enda ngachau tauka mai penanggul ngagai orang bukai. Puji Tuhan, semua pengawa kami mujur,” ku iya.

Pengajar Peni madah, penanggul kedua ditapi raban sida iya nya suntuk kereban dikena betabuh laban sekeda kereban ke suah dikena bisi nya nyau jai tauka pechah enda manah bunyi.

“Kami suntuk kereban laban enda tetangkupka penyampau tubuh nembiak ke deka enggau kami ba Raban Terang Pegari, kelimpah bisi kereban ke pechah bunyi.

“Berindik ari nya, kami sebuat bepupuka anak belanja diri ngambi bisi dikena meli kereban betabuh lalu bisi mega apai indai sanggup melika anak sida kereban dikena anak diri empu,” tusui iya.

SEATI SEPENEMU

Ari semua penanggul enggau penguji ke udah nyadi ngelama tu, Pengajar Peni ngasaika pemujur Raban Terang Pegari nya datai ari sukung enggau pengangkun semua raban; ari nembiak, apai indai, raban sekula enggau komuniti.

Laban ba penemu iya, kitai meseti begempung ati enggau pangan diri enti deka mansang ba siti-siti pengawa lalu nyapai juluk ati nunda jaku sempama, bebai baka bumai, betemuku baka nubai.

Iya mega ngasaika diri patut ngerandang jalai ngagai bala nembiak ke ngembuan pengelandik betabuh tang nadai orang ke ngembing, ngajar enggau meransang sida sebedau tu.

“Aku beratika mayuh nembiak kitai Dayak nyengkaum sida ke penakan, ngembuan pengelandik betabuh tang nadai orang ti ulih dikeandal ngembing enggau pechayaka penau sida.

“Tambah mega, sida nadai seling penemu nyengkaum nadai orang nunjukka endur tauka pelasar ke engkeman alai sida mantaika pengelandik nya sebedau tu.

“Nya alai, aku ngena peluang ke bisi baka panggau BDCF tu nyadi pelasar sida mantaika pengelandik nya, meri pengandal enggau peneleba baru ngagai sida ngemansangka diri, ukai semina nyulut ba akademik aja.

“Semua tu mujur ketegal pengangkun, seati enggau selubang penemu nuju siti juluk ati, ngelati enggau nyagu tabuh asal nyengkaum Belikan, ajat asal enggau main asal kitai Iban, pantun,” ku iya.

INOVASYEN TABUH

Pengajar Peni nyemetak madah, inovasyen betabuh bebala mayuh tu bepun ari siti penanggul, diangkat enggau dikerembai nyadi pengulih bala nembiak mantaika pengelandik.

Ari pengelandik nya tadi, ku iya, bala Raban Terang Pegari nyau bisi Orchestra Tabuh, siti pelasar sida ngansah penau enggau nambahka pengelandik diri.

Iya mega madah, Raban Terang Pegari ukai semina landik betabuh, bepantun enggau begendang aja, tang chukup kreatif enggau pintar ngadu inovasyen ari ngubah kereban muzik ditebah sida.

Ambika chunto ku iya, baka Sape, ke asal kereban muzik Orang Ulu ti ngembar Datun Julut enggau Lan E, ke bisi enam tali ngelama tu, nyau diubah nyadi Belikan ke nyadi tiga tali aja ngambi ulih ditebah ngembar Ajat Bujang Berani.

“Kitai Iban amat bisi Belikan, siti kereban muzik lama ti mujur diidupka baru, nyau deka baka  gamal Sape, tang bala nembiak aku agi suntuk kereban tu.

“Nya ngasuh kami teulihka runding ngaduka baru tali Sape nyadi tiga aja, ngambi ngasilka bunyi Belikan lalu ulih ditebah ngembar Ajat Bujang Berani.

Tu ari buah penemu enggau kreativiti bala nembiak empu.

“Baka disebut aku dulu tadi, penanggul suntuk kereban dikena betabuh maya kelas subjek Jaku Iban udah nyadi sumbuk inovasyen betabuh bebala mayuh lalu Orchestra Tabuh dipenyadi.

“Tu udah nyadi peransang enggau pemun Orchestra Tabuh ke mujur marit mayuh agi nembiak ngambi bagi, bela gagit nebah kereban muzik asal Iban ngading Ajat enggau Pantun Iban.

“Tu mih tuju asal kitai ngaga inovasyen chara betabuh bebala mayuh enggau Orchestra Tabuh ditengkebang suba lalu tu udah mandangka kreativiti bala rebak baru kitai.

“Lalu diatu, Raban Terang Pegari gah bediri, nyagu pesaka enggau identiti bansa Iban, merindang semua kitai enggau ati angkun,” ku iya netak randau.

MALAM DAYAK

Pengerami Malam Dayak serimbai BDCF 2026 nyadi peluang ti chukup manah dikena kitai ngemansang, ngintu sereta ngerembaika pasaka, adat enggau main asal Dayak, kelebih agi ngagai sida ke rebak baru.

Malam ke richah mantaika adat enggau main asal kitai Dayak meri chura enggau richah rami ngempung Orkestra Betabuh, Gerempung Bansa Dayak Sarawak (SDNU), Gerempung Bansa Orang Ulu (OUNA) enggau Gerempung Bansa Dayak Bidayuh (DBNA) segulai sejalai.

Malam Dayak mega mantaika penyelai ngepan asal raban bansa Dayak nyengkaum ngepan Dayak kontemporari ari keranjai jari Roses Salon and Acedemy.

Bala mayuh mega diperindang bala penyanyi tebilang Iban baka Angela Lata Jua, Rem Jana enggau Joannes Johnny Aman lalu pengawa malam nya meda indu bajik menggi gelar Miss BDCF 2026.

Entara bala pemesai ti datai enggau pengerami Chairman Kaunsil Mengeri Sibu (SMC), Kaunsilor Clarence Ting Ing Horh; Sapit Chairman SMC, Kaunsilor Mohammed Abdullah Izkandar Roseley; OC Pavillion Dayak, Kaunsilor Augustine Merikan sereta bala kaunsilor SMC.

Sekretari Mengeri Sibu, Henry Jalin Watt disempulang sapit iya, Sait Enggang; Sekretari Politik Premier Sarawak, William Anut; Temenggung Stanley Geramong; Chairperson Serakup Indu Dayak Sarawak (SIDS) Sibu ke mega Penyanding Penemu Miss BDCF 2026, Angelyn Uchi, Presiden SDNU Sibu, Chambai Lindung sereta bala bukai sama datai ngerichahka malam nya.