KUCHING: Randau Tujuh Taun Begulai enggau Premier ngasuh rayat Sarawak belematika pemar enggau isu ti ditapi nengeri tu kenyau tujuh taun ke udah.
Menteri Kereja Raya, Datuk Seri Alexander Nanta Linggi madah, randau nya endang mai reti laban ulih ngingatka rayat pasal baka ni ulah tuai enggau strategi Premier Sarawak, Datuk Patinggi Tan Sri Abang Johari Tun Openg mutarka semua penanggul nya nyentuk nengeri nyapai pemujur.
“Nya nyadi pelasar pemadu manah ngagai rayat betanya enggau mantaika isu ti ayan seraya Premier mega ulih bekunsi pekara pemansang enggau kuing Sarawak mansang manggai taun 2030.
“Abang Johari bejaku pasal baka ni Sarawak ulih nyapai asil RM13 bilion taun siti nyin kemari, penatai pemisi ti empai kala dijapai nengeri kitai,” ku iya.
Nanta bejaku munyi nya lebuh ditanya pemberita pengudah ngulu Randau Tujuh Taun Begulai enggau Premier ti diatur ba Bilik Ballroom Satok, Palan Aum Hikmah Exchange ditu, malam tadi.
