KUCHING: Randau betampung enggau Cambridge University Press and Assessment (CUPA) benung dipejalai dikena ngulih sadang penemu sereta intervensyen baru dikena nambah penyulut Matematik enggau Sains ba Ujian Penilaian Dual Language Programme (UP-DLP).
Menteri Pelajar, Inovasyen enggau Pemansang Penau Sarawak, Datuk Seri Roland Sagah Wee Inn madah, inisiatif nya diambi berindik ai pemutus pemadu baru UP-DLP ti mandang tikas penyulut nembiak sekula primari ba kededua subjek nya agi baruh.
“Kami seruran berandau enggau Cambridge lalu tu mih kebuah peresa tu dipejalai begulai enggau sida. “Inisiatif nambah penyulut nembiak tu begunaka kerejasama besai ukai semina enggau bala pengajar aja tang sektor peribit enggau serikat bepelasarka teknologi.
“Kebuah pia laban selinting kitai iya nya nyapai 60 peratus nembiak ti ngambi kus Sains, Teknologi, Injiniring enggau Matematik (STEM) manggai 2030 lalu tu mih awak kitai patut ransing agi gawa,” ku iya.
Sagah bejaku munyi nya rambau dirandau pemberita pengudah bejadi pengawa besilih Sempekat Pemereti Ati (MoU) entara Perintah Sarawak, Gerempung Apsirasyen Pengajar Sarawak enggau ARC Technologies Sdn Bhd di Kunsil Nengeri (DUN) Sarawak ditu, kemari.
Seriris enggau inisiatif nambah penyulut nembiak ba Sains enggau Matematik ba UP-DLP Sarawak nya, iya nyemetak madah, inisiatif Sarawak Collaborative Learning Interactive Experience (SCALE) negap pengawa belajar STEM.
“Kitai ulih meri peneleba belajar ti beselinting enggau ngasi agi ari peransang kitai ngagai nembiak belajar nengah aktiviti praktikal ti narak pengelandik berunding kritis enggau mutar penanggul.
“SCALE nempa pengawa belajar ti interaktif agi enggau muntang diakses nengah bantu bala pengajar ti merambu pengawa ngajar, matau pengerembai nembiak sereta meri sukung chara individualistik,” terang iya.
Tampung iya, SCALE mega bisi pengulih ngedut takah pengawa belajar dikena nentu nembiak di mengeri enggau menua pesisir bulih akses ngagai pemansut sereta peluang sebaka.
Nangkan nya, ku iya, pengerindu nembiak ngagai pengawa bekena ke aplikasyen enggau kereban digital nya siti pengelebih ti ulih matak perati sida ba pengawa belajar nengah SCALE.
Ngelansa pasal isu suntuk pengajar di Sarawak, Sagah nyemetak madah, Perintah Sarawak endang deka mai pulai pengajar Sarawak ti gawa di luar nengeri tu ngajar ditu.
“Kitai endang setuju lalu kitai deka sida pulai kitu tang pekara tu apin teputar laban sekeda sida udah bisi ruang bilik lalu ngentap pendiau diri di Semenanjung.
“Pia mega, kitai patut berati ke pekara bukai ti ngasuh sida enggai pulai kitu.
“Kitai ukai enggai ngambi sida, kitai sigi ngelalu pemulai sida tang sida bisi ngembuan dalih kediri empu ti patut diberi perati,” tampung iya.
