KOTA SAMARAHAN: Mensia mayuh dilalau nitihka Atur Tagang Pejalai (PKP) ti udah ditetapka pengudah bagi menua tu dirintai dalam Zon Mirah.

Chairman Kaunsil Kandang Menua Kota Samarahan (MPKS) Datuk Peter Minos madah, mensia mayuh ke diau ba Sarawak meseti bejalaika tanggungpengawa sida nitihka atur PKP sekalika kandang menua nya dirintai zon mirah tauka enda.

“MPKS mega udah bejalaika pengawa sanitasyen ba palan mensia mayuh, meri sanding penemu ngagai pemekal agih belanja lalu pembeli dikearap semampai likun ari kena rampit igi penyakit Covid-19 lalu sama mih kitai besampi ngarapka penusah besai tu deka abis.

“Semua kitai ngasaika penusah diatu laban diau jenuh ba rumah aja tang tu mih pengawa ke patut dikereja kitai ungkup pengelikun diri, menua Sarawak enggau Malaysia,” ku iya, apin lama ke udah.

Nambahka nya, sida meri besai terima kasih ngagai raban gawa ba luan kelebih agi bala lutur, indu misi sereta raban polis laban udah gawa sekumbang PKP tu.

“Kami meri tabi puji ngagai semua kitai lalu Petara aja ulih malas semua pemanah kita nagang pengerekai igi penyakit Covid-19 enggau sekumbang PKP tu dipejalai ba menua tu.

“Anang irau, kami ba Samarah mega baka kita semampai nitihka atur enggau bala ketuai sereta bala bukai mega sama diau jenuh ba rumah.

“Semua kitai meseti beserakup ngambika penusah besai tu deka abis sereta menua lantang enggau likun baka selama.

“Kelimpah ari nya, aram mih kitai beserakup nagang pengerekai igi penyakit Covid-19 tu lalu kitai deka menang,” ku iya nyemetak madah.