Rayat bejalaika hak milih ketuai – Adi Dewanto

Pengawa Bepilih Besai Indonesia

KUCHING: Pengawa bepilih tumu ba Pengawa Bepilih Besai Indonesia diatur kemari, ke alai enda ngelui 60 peratus rayat Republik Indonesia ti diau di menua luar udah rejista ngundi.

Ketuai Panitia Pemilih Menua Luar, Adi Dewanto madahka pengawa bepilih menua luar di Sarawak berengkah ari 8 nyentuk 14 April.

“Pengawa bepilih sehari tu dikumbai Palan Ngempung Peminta Menua Luar (TPSLN) ke alai 1,191 iku pengundi ti udah rejista nurun ngundi, penyampau tubuh nambah laban agi tubah sida ke bedau rejista.

“Undi nengah Kotak Suara Keliling (KSK) udah dipejalai kena 8 enggau 9 April tu tadi ba genap ladang enggau kilang di kandang menua pesisir Sarawak lalu undi pos udah dipejalai sebulan sebedau Pengawa Bepilih Besai, 17 April tu,” ku Adi lebuh dirandau raban media rambau atur pengawa bepilih TPSLN di Konsulat Besai Republik Indonesia (KJRI) Kuching.

BEJALAIKA HAK… Ketuai Panitia Bepilih Menua Luar, Adi Dewanto (kiba) begulai enggau Konsul Jeneral Republik Rakyat Indonesia di Kuching, Yonny Tri Prayitno.

Ba pengawa bepilih sekali tu, Republik Indonesia mungkal chara bepilih ke baru iya nya Kotak Suara Keliling (KSK), lalu piak Komiti Bepilih Besai Republik Indonesia mai kotak bepilih mindah kin kitu ngagai ladang enggau kilang di menua pesisir ngambika sida ke gawa ba genturung nya muntang bejalaika hak sida.

“KSK udah dipejalai ba enam bengkah endur di Sarawak iya nya di Miri ti mungkur Limbang enggau Lawas, Bintulu, Sri Aman, Sibu, Mukah enggau Kuching.
Pia mega ku Adi, palan nyimpan undi tu di palan logistik KJRI enggau ke bukai di luar KJRI.

“Palan tu dijaga bala pemesai polis ari Indonesia enggau kerejasama Polis DiRaja Malaysia (PDRM) bejalaika pengawa matau endur undi disimpan.

“Nitihka undang-undang, kami diasuh muai undi kandang sepuluh jam, berengkah ari pukul 8 pagi lalu tembu urung pukul 6 lemai,” ku iya nambah.

Seraya, Republik Indonesia meda Chairman Parti Gerakan Indonesia Raya (Gerindra), Prabowo Subianto nyatup penyandang Presiden Indonesia Joko Widodo, berebutka penuduk Presiden.

Suara Sarawak