Rayat diperansang nanam sayur chara hidroponik

SERIAN: Perintah meransang rayat di nengeri tu ngujika pengawa betanam chara hidroponik.

Menteri Muda Betanam Betupi Moden, Tanah Adat Enggau Pemansang Kandang Menua, Datuk Roland Sagah Wee Inn madah, pengawa betanam chara hidroponik dikeandal mansutka asil sayur ke lebih bekualiti.

“Sayur ke ditanam ngena chara hidroponik tu lebih tan dibanding chara konvensional enggau nyamai dikereja nyema nadai ngembuan tanah ke besai.

“Nya alai, rayat tau nguji nanam sayur ngena chara hidroponik dikena nyungkak asil ti lebih produktif,” ku iya.

Iya ke mega Adun Tarat madah munyi nya rambau program Peransang Komuniti Ba Pengawa Betanam Betupi (AgriCOP) Renggat 3/2020 Dun Kedup kena hari enam tu tadi.

Berebak enggau program nya mega, Adun Kedup, Martin Ben lebuh ke bejaku bisi madah nengah program nya mensia mayuh udah diterangka pasal betanam betupi ngena chara baru kelimpah baka ni teknologi moden ulih nambahka pengelikun, kualiti enggau asil produk ke dikereja. -Ukas

Suara Sarawak