SIBU: Peranak ba menua pesisir kelebih agi sida ke diau ba rumah panjai dipinta nitihka Atur Nagang Pejalai (PKP) Covid-19.

Sapit Menteri Pengerai Kedua, Datuk Aaron Ago Dagang madahka peranak menua pesisir mega sama nitihka atur nya.

“Dikearap, peranak menua pesisir semampai nitihka PKP tu sepanjai timpuh ke udah ditetap.

“Pengerekai igi penyakit Covid-19 ulih ngeruga pengerai enggau enda milih sapa-sapa.

“Tang, kita ke diau ba kandang menua pesisir enda bereti kitai likun tauka dijamin ari kena rampit Covid-19,” ku iya lebuh nangkan peranak menua pesisir ba opis menteri iya di Putrajaya.

Aaron ti mega Kaban Parlimen Kanowit madah, genap Tuai Rumah meseti bejalaika pangku pengawa sida nentuka PKP ulih dipejalai enggau manah kelimpah nagang peranak sida pansut ari rumah nadai kebuah.

“Lebuh kitai nyaga pengerai enggau pemeresi diri, dikearap pengawa tu deka nyeliahka semua kitai ari kena rampit Covid-19 tu,” ku iya nyemetak madah.

Aaron mega ngelalau peranak rumah panjai ngambi semampai nemu berita pemadu baru pasal igi penyakit tu nengah media enggau penerang ke betul.

Ku iya, semua sida anang irau tauka pechayaka berita ke apin ditemu pengamat iya laban pekara nya tauka ngasuh irau tauka begau maya PKP dipejalai.

“Aram mih kitai sama nitihka atur PKP tu enggau ngulihka penerang pemadu baru nengah media aja.

“Nengah kerejasama enggau nitihka PKP tu, ngarapka pengawa tu ulih munaska pengerekai igi penyakit di menua tu.

“Kerejasama enggau penyedar sentang pekara tu beguna amat. Nya kebuah, titihka PKP enggau jaga pengerai diri,” tandu iya.