MIRI: Peranak ba mengeri tu diperansang ngalih ngagai sistem e-bil enggau lengkas ngambi mayar bil taksiran ungkup taun 2024 ngagai Majlis Bandaraya Miri (MBM).
Datuk Bandar Miri, Adam Yii Siew Sang madah, pengawa ngalih ngagai sistem e-bil tu beguna endar nyadi inisiatif MBM ngangkat mengeri Miri nyadi siti ari mengeri ti meruan sereta nyendiaka servis bekualiti tinggi sereta lengkas ngagai mensia mayuh.
“MBM keran nyendiaka servis meruan ngagai rayat seraris enggau inisiatif ekonomi digital enggau juluk nyendiaka servis nyulut.
“Nya kebuah, kami ngansak peranak ba mengeri tu milih e-bil enggau ngemaru penerang sida enggau Unit Serenih enggau Ngemanah nentuka notis dianjung jampat.
“Pia mega, pengawa ngalih ngagai e-bil nya chara bebayar ba ujung tunjuk jari ti mantu nyeliahka pengawa bebaris panjai ba kaunter maya bebayar,” ku iya.
Adam Yii mansutka jaku nya ba Aum MBM ti keterubah ba taun 2024, ditu tadi.
