MIRI: Perintah Sarawak naka ulih bekunsi pejalai pemansang telekomunikasyen ba Sarawak nengah bemacham program.
Ku Menijar Besai Kaunsil Multimedia Sarawak (SMA), Datuk Dr Anderson Tiong Ing Heng, Randau Pemansang Telekomunikasyen Sarawak diatur ngambi nerang ngagai mensia mayuh pasal pejalai pemansang telekomunikasyen ba Sarawak.
“Ari pemujur program baka tu di Sibu kena 24 Oktober tu tadi, diatu kitai nyingkang ngagai mengeri Miri ngambi nerang ngagai mensia mayuh bekaul pemansang telekomunikasyen ba Sarawak.
“Nya kebuah, kami deka mendingka taklimat ari bemacham ejensi baka Digital Nasional Berhad (DNB) enggau Ejensi Nuklear Malaysia nyengkaum SMA,” ku iya ba Randau Pemansang Telekomunikasyen Bagi Menua Miri, kemari.
Nambahka nya, Dr Anderson meri besai terima kasih ngagai Tuai Komuniti enggau Tuai Raban Bansa (KMKK) ti datai ngagai program nya.
“Nyadi sebuah ejensi perintah, kami semampai ngenang pangku pengawa tuai komuniti enggau tuai raban bansa mantaika sada komuniti,” terang iya.
Nitihka penerang, ejensi bukai baka Komiti Besai Komunikasyen enggau Multimedia Malaysia (SKMM) sereta Kaunsil Pemansang Ekonomi Digital Sarawak (SDEC) mega meri taklimat kelimpah bisi saut tanya ba pengujung program.
