BINTULU: Gempung Parti Sarawak (GPS) terus mantaika polisi inklusif pasal pemansang ungkup rayat menua tu.

Kaban Kunsil Nengeri (ADUN) Murum, Kennedy Chukpai Ugon madah, GPS semampai nentuka genap sitak ba Sarawak bulih pemaik ari genap buah pemansang nadai ngira pekara rampa menua, etnik tauka politik.

Chukpai ke mega ngetuai Ops Room Parti Rakyat Sarawak (PRS) ungkup Pengawa Bepilih Mit (PRK) Kunsil Nengeri (DUN) Jepak madah, nya endang patut enti sema sekeda parti bukai ba Sarawak ti sebedau tu besemekih chara politik, diatu meri sukung penuh ngagai GPS.

“GPS nyata enggau pekara ditegi, keran enggau inklusif dikena ngelanggur pemansang ba Sarawak.

“Nama kebuah aku madah laban enti kitai meda ba Pengawa Bepilih Nengeri (PRN) ke udah, sekeda parti ba Sarawak tu besemekih enggau GPS tang diatu sida meri sukung tegut ngagai GPS.

“Kitai meda mega maya nganjung nama chalun PRK DUN Jepak lebuh nya, bisi parti bukai ti datai begulai meri sukung ngagai chalun kitai.

“Tu ketegal polisi GPS chukup inklusif ngemansang semua sitak ba Sarawak,” ku iya.

Chukpai mansutka jaku nya ba Program Desa Cerdas diatur Opis Pemansang Komuniti (KEMAS) Bagi Menua Bintulu ba Rumah Lebong Luang, Hari Dua tu tadi.