SIBU: Renggat keterubah projek ngaga opis baru Kaunsil Pelilih Menua Pesisir Sibu (MDLBS) disadang tembu ba bulan Ogos 2025.
Chairman MDLBS, Sempurai Petrus madah, pekara dikemerat ba renggat keterubah projek nya baka kereja tanah, batang paip, pagar pengetan, servis mekanikal enggau ti bukai.
“Projek tu dipelanja penuh Perintah Sarawak ba baruh Langgur Pemansang Malaysia Lumpar Ke-12 (RMK-12) ti beungkur RM4.1 juta.
“Opis baru ti bepalan di mengeri Sibu Jaya tu chukup strategik dikena meri servis ngagai peranak di menua pesisir enggau menua ulu kelimpah nyadi pemungkal polisi kaunsil,” ku iya.
Sempurai mansutka jaku nya rambau aum pemberita pengudah aum ngelanchar projek nya ditu, kemari.
Tampung iya, pengawa ngaga opis baru nya dikearap ulih nyadi penyungkak ngagai pemansang ngelingi nya kelebih agi pengudah bisi Jalai Besai Pan Borneo sereta ngemansangka Sibu Jaya nyadi ‘Sapit Mengeri Sibu’.
Iya madah, MDLBS deka minta agih belanja sepenyampau RM40 juta ba baruh RMK-13 ungkup renggat kedua ti ngaul pengawa ngaga begunan opis, landskap, servis mekanikal enggau elektrik sereta kereja luar.
Bela datai, Sapit Chairman MDLBS, Wong Ching Yong, Sekretari MDLBS, Ng Siang Wei enggau kaban kaunsil. – EDISI UKAS
