SERIAN: Mandal Presiden Kanan Parti Pesaka Bumiputera Bersatu (PBB) Datuk Amar Douglas Uggah Embas baka ti meri ulu lungga penyandang Dun Bukit Semuja John Ilus disadang deka dikirau baru baru ba Dun nya ungkup Pengawa Bepilih Besai Nengeri (PRN-12) tu ila.
Ku iya, John udah meri servis ti manah sepengelama udah ngarika rayat di Dun Bukit Semuja lima taun ke udah.
“Iya siku orang biak, agi regas enggau meri servis ti manah sereta ngemantupka ati semua orang.”
“Iya mega nunjukka rikod ti manah laban seruran mantu perintah ngemansangka sitak Dun Bukit Semuja ngelama tu,” ku iya maya bejadika Program AgriCop Komuniti di Balai Raya Kampung Remun ditu, ensana.
Taja pia, iya madahka pemutus nya agi bepanggai ngagai Presiden PBB ti mega Kepala Menteri Datuk Patinggi Tan Sri Abang Johari Tun Openg.
Iya nangkan nya madahka, enda ngira sapa ti deka bediri ba Dun Bukit Semuja ila, rayat kandang menua nya patut meri sukung majoriti besai ngagai pengari Gempung Parti Sarawak (GPS).
“Kami di GPS deka terus ngatur pemansang di Sarawak awakka menua kitai maju ba taun 2030,” ku iya.
Ba PRN-11 (2016) suba, John menang ba Bukit Semuja nengah tikit Barisan Nasional (BN) enggau 5,451 undi ngalahka Edward Andrew Luwak (DAP), Frederick Bayoi Manggie (Bebas), Cobbold Lusoi (PBDS Baru) enggau Johnny Bob Aput (STAR).
