KUCHING: Sarawak begunaka urung RM2.5 bilion dikena nyungkak infrastruktur umai ti deka nambah asil beras enggau ngurang kelalu bepanggai ba import.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, skim parit enggau entali ai ke diatu mungkur urung 9,900 hektar ke ulih nyaup bejadika juluk ati tikas ngidupka diri (SSL) beras manggai 60 peratus ba taun 2030.
“Semina 11 peratus ari endur nya dikereja, ketegal bisi infrastruktur patut diaduka baru,” pia ku iya.
Iya madah munyi nya maya ngenataika jaku simpul ari opis menteri iya ba Aum Kunsil Nengeri (DUN) Sarawak Ke-19, Hari Dua.
Ba pekara bekaul, ku iya, bisi 23 projek infrastruktur ke mungkur 2,997 hektar udah dikemendarka nengah Langgur Pemansang Malaysia Lumpar Ke-13 (RMK-13) enggau penyampau ungkus RM136.9 juta.
Ari penyampau nya, iya madah, RM122.9 juta dipelanja Perintah Sarawak dikena ngaga 21 projek lalu RM14 juta ari Perintah Besai dikena ngaga dua iti projek. — EDISI UKAS
