KAPIT: Sepenyampau RM217,600 diberi ngagai 26 penerima di Bahagian Kapit dikena nyukung bemacham program komuniti, pelajar, lumba enggau main sereta ngintu pengelantang.
Agih belanja nya disua Menteri Kereja Raya Malaysia ke mega Kaban Parlimen Kapit, Dato Sri Alexander Nanta Linggi ba siti pengawa nyua chek ba siti hotel, ditu, Hari Minggu.
Ari penyamapau nya, RM70,000 diberi ngagai 12 penerima ke bela nerima RM5,000 ungkup nyukung pelajai Program 100 Taun Bebaik, seraya Yayasan Tun Jugah nerima RM10,000.
Komiti Pemansang enggau Pengelikun Genturung Pendiau (JKKK) Ng Semulong Amang nerima RM20,000 dikena ngaga agu mensia mayuh, seraya JKKK Tembawai Sandong Atas Sut nerima RM3,000 dikena meli laptop enggau mesin penchelak dikena ngadu pengawa.
Agih belanja nya mega disua ngagai mayuh organisasyen nyengkaum Serakup Apai Indai enggau Pengajar (PIBG) Sekula Sekondari (SMK) Katibas, Gerempong Bala Indu Gerija Methodist Bukit Goram, Gerempung Nempa Pemanah Ulah Che Quan Khor enggau Koperasi SMK Kapit No. 2 Berhad dikena nyukung aktiviti sida.
Berebak enggau nya, Dato Sri Alexander Nanta Linggi nyemetak madahka pemesai guna akauntabiliti ngatur belanja enggau nentuka tetiap pemeri dirikod manah enggau dikena nipakka tuju ke ditetapka.
Iya madah, pengawa ngatur ke lurus enggau bisi tanggunggungpengawa beguna endar nentuka agih belanja meri pemaik ngagai komuniti sereta mantu penerima ngatur program ke dilanggur enggau mujur.
Sama datai, Sapit Residen Sitak Kapit Robert Liman Deli, Sekretari Politik Menteri Kereja Raya Malaysia Datuk Alvin Runggah Jimbun sereta Direktor Kandang Menua URDA Sagu Unting. — EDISI UKAS
