Rohingya ngampar ke sebarang menua

Beratus ribu raban Rohingya benung ngampar ngagai sebarang menua pengudah sida napi penyarut besai diburu soldadu Myanmar kena 25 Ogos 2017.

Entara menua di Asia ke dilawa sida nyengkaum Bangladesh, Malaysia, Indonesia, Thailand enggau mayuh ke bukai. Sida tu angkat ari ari Myanmar nengah jalai darat enggau tasik.

Nitihka penerang ari Gerempung Bansa Dunya (PBB), ulah ke digaga soldadu Myanmar tu tau dikumbai munaska bansa.

Nama kini pekara ke nyadi, ngujungka sida tu diburu sereta ngampar ngagai sebarang menua? Sapa Rohingya?

Nitih penerang penyampau raban Rohingya di Myanmar ba pun taun 2017 dipelaba urung sejuta iku. Sida mega entara bansa ke pemadu mimit di menua nya.

Sida megai pengarap Islam lalu nyadi raban Islam ke pemadu mayuh nguan nengeri Rakhine di Myanmar. Sida mega ngembuan jaku, adat enggau daya pengidup diri empu.

Raban Rohingya ngelar diri datai ari peturun pedagang Arab lalu udah lama ngentapka pengidup di menua nya. Taja pia, perintah Myanmar enda ngaku sida tu rayat asal Myanmar.

Kenu ku perintah Myanmar sida tu orang luar tauka kampar ke datai ari menua Bangladesh. Kenyau ari taun 1970-an sida udah berengkah ngampar ngiga pengidup ngagai sebarang menua enggau penyampau ti chukup mayuh.

Ba penyarut besai kepenudi nyadi dalam bulan Ogos 2017, raban penyelawai Rohingya diperita bisi nyerang 30 buah palan polis enggau soldadu Myanmar.
Bekau ari penyarut nya, 12 iku polis Myanmar mati kena bunuh lalu soldadu Myanmar malas serang enggau nunu rumah ngujungka urung 6,700 iku bansa Rohingnya parai bepelasarka ripot MSF.

Udah nya, nitih pansik ke digaga raban PBB dalam taun 2018 dia gerempung dunya nya nuduh soldadu Myanmar ngereja ulah ti kelalu kasar enggau raban Rohingya.

Taja pia, pekara nya ditingkah Menteri Besai Myanmar Aung San Suu Kyi ba kort dalam bulan Disember 2019. Udah nya, kena bulan Januari 2020 pemutus kort ngerah perintah Myanmar bejalaika atur bekurung awakka sida ulih ngelindung bansa Rohingya ari terus dipenyati enggau dibunuh.

Tebal agi bansa Rohingya ti ngelarika diri ari Myanmar ketegal penyarut nya mupuk beserakup enggau beratus iku raban Rohingya ke endang lama ngampar sebedau tu.

Kena bulan March 2019, perintah Bangladesh udah mansutka gerah sigi enda nerima bansa Rohingya ti ngejang lari ari menua Myanmar.
Taja udah bisi sempekat digaga ba pun taun 2018 awakka raban Rohingya tu dikemendar pulai ngagai menua Myanmar tang pekara nya enda nyadi ba dunya nyata.

Raban Rohingya madah diri sigi enda pulai ngapa ngagai Myanmar seagi sida enda dijamin diberi status nyadi peranak menua nya.

Diatu lebih 900, 000 raban Rohingya diperita benung ditan ba kem-kem kampar di menua Bangladesh lalu semina nganti jam enggau peluang lari ngagai sebarang menua ke ulih nerima sida.

Pekara ke nyata jam diatu, Myanmar enggau Bangladesh siga mutus ati enda nerima bansa Rohingya pulai ke menua nya.

Pia mega sebarang menua bukai di Asean diatu enda ulih nerima penatai tauka penyangkai kapal ke ngundan Royingya.

Ambika chunto sebuah kapal ke ngundan urung 202 iku Rohingya ditemu raban soldadu maritim ba kandang tasik Pulau Langkawi pun bulan April tu tadi udah diasuh pansut ari kandang tasik menua tu laban dikenangi mai Covid-19.

Taja pia raban maritim ti muru sida tu diripot agi ngembuan ati sinu laban bisi meri barang pemakai dikena raban Rohingya tu ngidupka diri nyadi kampar.

Suara Sarawak