ELESSYA RIMA
Pelatih UNIMAS
KUCHING: SAC Lim Bak Phai rasmi ngesan pangku pengawa nyadi Komander Briged Sarawak Tim Operasyen Am (PGA) ba sebengkah program nyerah enggau nerima pangku pengawa nya ti diatur di Bilik Aum Pegawai Kanan ditu, kemari.
Ungkup penerang, SAC Lim nganti penuduk ex-Komander Briged Sarawak PGA, SAC Dr Che Ghazali Che Awang ti deka dipadu nyadi Komandan Maktab Polis DiRaja Malaysia (PDRM) sereta niki pangkat nyadi Sapit Kepala Polis (DCP).
Sapit Direktor Opis Pengelikun Dalam Menua enggau Pengelantang Mensia Mayuh (KDNKA) PGA, DCP Datuk Mohamad Suzrin Mohamad Rodhi diberi basa bejadi program nya.
Pengawa nyiri SAC Lim nyadi tuai Briged Sarawak PGA nya beguna amat ungkup nyaga pengelikun Sarawak kelebih agi ba genturung adan menua.
Mohamad Suzrin nyemetak madah, pangku pengawa nya begunaka penau nyadi tuai, penegap integriti sereta pemintar ngaga pemutus lebuh napi situasyen ti mar.
“Pengawa nyiri tu siti basa ti chukup besai lalu aku andal SAC Lim ulih ngiring Briged Sarawak PGA sereta mai tim tu nyapai penyulut ti tinggi agi,” ku iya.
Iya mega minta semua kaban Briged Sarawak PGA meri kerejasama tegut ngagai tuai sida ti baru dikena nentu operasyen pengelikun lanchar enggau efektif.
SAC Lim sebedau tu kala mangku pengawa strategik ba Polis DiRaja Malaysia (PDRM) sereta ngembuan mayuh peneleba ba pengawa bejalaika operasyen enggau nyaga pengelikun.
Berebak enggau nya, Mohamad Suzrin meri besai terima kasih ngagai tuai Briged Sarawak PGA sebedau tu iya nya SAC Dr Che Ghazali ketegal mujur nempa mayuh penyulut ngagai tim nya.
