SADIA-Apan besaup ngiri penemu chara belajar ti betul
KRIAN: Serakup Dayak Iban Sarawak (SADIA) Pampang Krian mujur numbuhka Raban Penyanding Penemu Ari Luar tauka External Advisory Panel ti disadang ulih nyaup ngemata enggau ngemansangka Program Bantu Pekara Sekula (Ngambat) ti diberi nama Program SADIA-Apan.
Tiga iku panel ari luar ti udah dipilih; Professor Madya Dr. Jennifer Tunga Janang, Professor Madya Dr. Bromeley Phillip enggau Danggat A. Chabo ti benung nampung pelajar tikas PhD ba Univerisiti Malaysia Sarawak (UNIMAS) diatu setuju meri sanding penemu ngagai Program Sadia-Apan tu.
Chairman SADIA Krian, Andrew Paul madahka diri temegah ati laban udah mujur nempa kaul entara pengelandik mansik pekara ba bidang Injinir enggau bidang akademik.
Andrew sebedau tu tampak rita ngatur program ba sekula bemalinka nama Sadia-Apan lalu pengawa iya mayuh ngemai pemaik ngagai raban diselinting.
SADING PENEMU: Panel Penyanding Penemu Ari Luar Sadia-Apan: (ari kiba) Danggat A. Chabo, Professor. Madya Dr. Jennifer Tunga Janang enggau Professor Madya Dr. Bromeley Phillip.
“Ngelama tu kitai ngasaika tebal agi bala apin meda pangka pansik bidang Injinir ba pekara sekula, nya kebuah maya pengelandik tu dipegulai enggau bidang akademik, iya endang ngasi,” ku Andrew ti mega ngembuan peneleba gawa nyadi Injinir pengelama 15 taun, kelebih agi pengawa mansik enggau ngemansang (R&D) Yield Enhancement.
Program Sadia-Apan dibagi ngagai tiga isi program lalu ‘Learning Awareness & Study Smart’ ti keterubah udah diatur dalam taun 2016.
Program tu nguji meri runding ngagai nembiak pasal pengawa sekula. Asil pansik udah dipejalai sentang penanggul enggau pemujur besekula nyadi penemu keterubah deka dikunsi begulai enggau apai indai lalu semina apai indai ti udah ngulu licha penerang tu aja dikemendar nganjung bala anak sida ngulu program tu.
MUNGKAL: Rebak keterubah program dipejalai ba Apan, Kaki Wong, Krian, Saratok dalam taun 2016.
Ngelansa tiga isi program tu iya nya keterubah, nguji bekunsi penemu, ulah enggau pengawa dikereja sida ti udah mujur ba pengawa besekula.
Kebuah kitai bekunsika penemu tu laban enti kitai ulih nitihka runding, ulah enggau pengawa sida tu, besai amat peluang kitai deka mujur.
Isi kedua, kitai nguji muka runding nembiak nengah chara bekunsika penemu ti udahd itemu bala sainstis pasal pemesai kuasa enggau chara untak kitai gawa tauka berunding sereta chara kitai ngingatka pekara.
“Teori Parallel Distributed Processing (PDP) ti dikunsi kitai nyadi teori ti udah mujur dikena nengkebang Robot ti nemu berunding sereta betanya – saut enggau kitai (Artificial Intelligence),” ku Andrew.
Lalu isi ketiga, kitai nguji bekunsi chara muntang ti dikumbai tips & tricks, ti ulih dikena nembiak nambahka pemereti sida ba pekara dipelajar (understand), nyelinting runding (focus) enggau ngingat (memorize) penemu dipelajar sida.
MUJUR: Rebak kedua program mujur diatur ba Librari Nengeri Sarawak dalam taun 2017.
“Kitai mega bekunsika chara belajar enggau chara ti engkeman baka SQ3R. Chara tu enti dikena bala nembiak memanah, endang jauh muntang lalu ulih nyaup kitai ti nadai bekenaka sebarang chara tauka strategi belajar.
“Kelimpah ari nya, baka ni chara deka ngepun enggau dini endur kitai tau belabuh nitihka singkang bala bukai, tu siti pekara ti chukup beguna ngagai bala nembiak ti udah jauh tinggal ba pelajar sekula tang agi keran nitihka singkang sida ke udah dulu,” ku Andrew nambah.
Learning is Fun! tauka pengawa belajar ngerinduka ati. Nitihka pansik ku Andrew, nembiak ti nemu chara belajar ti betul, endang angkun sereta ransingka pengawa belajar.
Enti bisi nembiak dipeda nadai ati ransing enggau angkunka pelajar, tu dikumbai bisi ‘penyakit’, chara belajar baka macha surat berita lalu tu chara ti salah laban pengudah 10 minit macha, kitai nadai ingatka pekara ti udah dibacha.
Nya kebuah Program Sadia-Apan tu ditumbuh nyadika palan kitai nyidi enggau meresa penyakit nembiak lalu ngubat sereta nyumanka iya, ku Andrew madah nyemetak.
Program Sadia-Apan dipejalai nengah workshop pengelama lima hari berunggu ungkup nembiak Pom Satu ngagai Pom Tiga.
NERIMA TIMBAL: Rebak ketiga program udah diatur ba Librari Nengeri Sarawak dalam taun 2017.

Suara Sarawak