PUTRAJAYA: Sumbangan Asas Rahmah (SARA) ungkup genap peranak menua ti beumur 18 taun enggau tuai agi ari nya sepenyampau RM100 deka ditampung taun tu lalu deka dipasuk kena 9 Februari tu.
Menteri Besai, Datuk Anwar Ibrahim madah, bantu nya deka meri pemaik ngagai 2.2 juta rayat Malaysia.
Iya madah, bantu nya ulih dikena sida nyikap diri ngintu pengerami Taun Baru China enggau penatai bulan Ramadan.
“Bantu tu deka dipasuk kena 9 Februari sereta meri pemaik ngagai sida nyikap diri ngintu Taun Baru China enggau Ramadan,” ku iya.
Anwar bejaku munyi nya rambau aum ninting bulan raban Opis Menteri Besai ditu, kemari. Iya ti mega Menteri Pekara Wang madah, bantu SARA ungkup penerima umang deka dipasuk kena 9 Januari.
“Pia mega, Sumbangan Tunai Rahmah (STR) renggat satu enggau penyampau RM500 deka dipasuk kena 20 Januari tu,” ku iya. – BERNAMA
