Sarawak ba penuduk atas dipilih raban pemeranak puku

KUCHING: Sarawak ba penuduk pemadu atas dulu dipilih nyadi palan beranakka puku ba Malaysia ke alai RM15.8 bilion dikena beranakka puku dalam sektor kilang ba timpuh semilan bulan keterubah, taun tu.

Sapit Kepala Menteri Datuk Amar Awang Tengah Ali Hasan madah, kebuah pia laban peminta dunya ke majak nambah ungkup perengka digital, disc, aplikasyen sereta palan nyimpan kuasa enggau produk automotif.

“Pia mega, Taiyo Yuden, Western Digital (HGST), Teknologi IMM (Iljin) enggau X-FAB nampung pengawa nangkir kilang sida ba Sama Jaya beungkus RM6.46 bilion.

“Pemeranak puku luar ti beranakka puku maya tu nyata nunjukka sida bisi pengandal ngagai menua kitai,” ku iya.
Iya ti mega Menteri Dagang Entarabansa enggau Industri, Terminal Industri enggau Pemansang Pedagang (Mintred) mansutka jaku nya lebuh nyimpul jurai Mintred ba Aum Dun, ditu tadi.

Ku iya, entara pemeranak puku ti beamat ngiga peluang beranakka puku ba menua tu nyengkaum sebuah serikat Korea Selatan ti datai kitu apin lama ke udah ngambi ngaga pansik enggau beranakka puku RM2.3 bilion.

“Pemeranak puku ari China benung minta tama ke Sarawak ngambi nampung pansik dalam batimetrik ungkup projek minyak enggau gis ti diperambu penyampau USD 5.2 bilion.

“Kerejasama entara SEDC Energy Sdn. Bhd. enggau Sumitomo Corporation Jepun sereta ENEOS Corporation dikena numbuhka perengkaguna pemansut hidrogen ba Bintulu.

“Kami mega udah berengkah berandau enggau serikat luar ke bukai pasal projek hidrogen tu,” terang iya.

Nambahka nya ku iya, Kaunsil Pemansang Kayu Ramu Sarawak (STIDC) enggau serikat Jipun benung bekerejasama dalam projek pellet bahan bakar industri biojisim beungkus RM126 juta enggau disadang dipejalai ba Tanjung Manis, tengan taun 2022.

“Nangkanka nya, projek bateri beungkus RM500 juta di Demak Laut benung dipejalai lalu nya pengawa begulai entara serikat China enggau Sarawak.

“Sama enggau projek keluli beungkus RM17.05 bilion di Samalaju disadang nyendiaka taba enda lama agi seraya loji metanol beungkus RM5.7 bilion di Kidurong benung ditembu,” ku Awang Tengah nerang.

Awang Tengah nyemetak madah, opis menteri iya deka ngena semua perengkaguna ngambi enda masau peluang sereta terus dipilih palan beranakka puku ba Malaysia taja maya pandemik Covid-19 tu.

Suara Sarawak