Sarawak beratka pemansang kuasa hidro

KUCHING: Pengawa nyain ‘Term Sheet’ entara Serikat Sesco Berhad (Sesco) enggau Malaysia LNG Sdn Bhd (MLNG) mandangka pemanah kaul entara Sarawak Energy Berhad (Sarawak Energy) enggau Petroliam Nasional Berhad (Petronas).

Kepala Menteri Datuk Patinggi Abang Johari Tun Openg madahka pengawa nyain sempekat nentuka Sarawak bekunsika kuasa ulih dikena baru enggau pemain kuasa bukai dikena ngemansangka kuasa meruan.

“Pengeran nyendiaka bekal kuasa 90 megawatt (MW) ngagai kompleks LNG Malaysia di Tanjung Kidurong pengelama 20 tahun mandangka pengandal, ukai semina penau Sarawak Energy nyendiaka kuasa tang mega mandangka pengandal Petronas ba Sarawak ungkup timpuh panjai,” terang iya.

Abang Johari mansutka jaku nya dalam Pengawa Nyain ‘Term Sheet’ entara Syarikat Sesco Berhad enggau Malaysia Lng Sdn. Bhd ba Opis Kepala Menteri, Wisma Bapa Malaysia, Petra Jaya, ditu kemari.

Terang iya, pengawa nyain sempekat komersial (CSA) kena 7 Disember taun nyin kemari entara Petronas enggau Sarawak mega mesti nyadi pengandal entara kededua raban ba pemansang aktiviti ngiga pemansut minyak enggau gis ba menua tu.

“Sempekat sekali tu nitihka Sempekat Pemereti Ati (MoU) ti disain taun nyin kemari entara kededua raban begulai nyerungkai pemansut enggau bekal komersial hidrogen gadung ngambi ulih ngemansangka ekonomi hidrogen gadung ungkup Sarawak enggau ke bukai,” terang iya.

Nangkan nya, iya madahka Perintah GPS Sarawak keran nentuka semua pemansang tu ulih nyungkak ekonomi bepenatai pemisi manggai taun 2030.

Perintah Sarawak deka nyebela pemansang ekonomi rama enggau ngintu rampa menua.

“Tu mandangka pemutus kami beratka pemansang kuasa hidro ti ulih dikena baru nyadi pemansut ngambi nyapai status bepenatai pemisi manggai taun 2030 nengah Koridor Kuasa Ulih Dikena Baru Sarawak (Score) ba taun 2009.

“Kami mega ngemeran loji kuasa gis termal enggau arang batu ungkup pengelikun pemansut nya,” terang iya.

Nambahka nya ku Abang Johari, pengawa ngalih ngagai polisi kuasa strategik ti lebih ari sekurun ke udah meri mayuh pemaik ngagai rayat ba menua tu.

“Berapa taun ke udah, perintah ulih nyendiaka rega karan nengah rega ke patut ba Malaysia enggau wilayah iya.
“Tu mega nyungkak ekonomi ngambi matak pemeranak puku beranakka puku ba Sarawak.

“Entara taun 2008 ngagai 2020, 12 bengkah sempekat meli kuasa (PPA) udah disain enggau industri ba Score sereta Sempekat Besilih Kuasa enggau PLN di Kalimantan Barat ke alai 2,900 megawatt (MW) udah disedia,” terang iya.

Nangkan nya, iya meri tabi puji ngagai Petronas laban tetemuka dua telaga gis baru ba kandang tasik menua apin lama lalu nya kebuah Sarawak deka bekerejasama enggau Petronas bekaul CSA.

“Tu mega juluk Sarawak deka bisi bekal gis asli ti chukup enggau nyadi pemekal aktiviti gis udah diproses di Sarawak kelebih agi dekaka Bintulu nyadi hab industri gis.

“Aku ngarapka Sarawak Energu enggau Petronas terus nempa mayuh agi kerejasama ti ditempa nengah sejarah bebakih nentuka pengelantang timpuh panjai ungkup semua,” ku Abang Johari nerang.

MUJUR… Pengawa nyain ‘Term Sheet’ entara Serikat Sesco Berhad (Sesco) enggau Malaysia LNG Sdn Bhd (MLNG) dipejalai nengah online.

Suara Sarawak