KUCHING: Sarawak bisi pengulih besai nyadi palan neutraliti karbon di rantau ASEAN ti disungkak pemansang infrastruktur enggau polisi kemerah beranak puku.
Premier Sarawak, Datuk Patinggi Tan Sri Abang Johari Tun Openg madah, beguna amat nentu penyulut projek neutraliti karbon seraris enggau inisiatif negap kerejasama enggau bemacham raban nyengkaum Mitsubishi Corporation.
“Randau silik deka ditampung ba aum dudi hari dikena ngaluska agi gaya kerejasama entara Mitsubishi Corporation enggau Sarawak dalam sektor kuasa meruan,” ku iya.
Abang Johari mansutka jaku nya pengudah nerima penemuai basa ari Mandal Presiden Eksekutif Mitsubishi Corporation, Kiyotaka Kikuchi di Wisma Bapa Malaysia ditu, tadi.
Mitsubishi Corporation madah ke komitmen sida terus bekerejasama enggau Perintah Sarawak ngemansangka neutraliti karbon.
Terang Kiyotaka, komitmen nya ngelai siti pengawa ngaku ngagai kaul rat ba pengelama 50 taun entara serikat konglomerat nya enggau Perintah Sarawak.
Nangkan nya, ku iya, ba penemuai basa nya, sida bela berandau pasal pengerembai dagang dudi hari ti meri perati besai ngagai inisiatif kuasa gadung enggau pemeruan rampa menua.
“Kami bedau berandau silik pasal sekeda projek tang randau kami sehari tu meri perati ngagai pemaik begulai enggau strategi dudi hari,” terang iya.
