KUCHING: Setipikit ngaku Sarawak Delta UNESCO Global Geopark (UGGp) udah disua ngagai Premier Sarawak, Datuk Patinggi Tan Sri Abang Johari Tun Openg ba siti pengawa rumpas diatur di Kompleks Satria Pertiwi, kemari.
Setipikit nya disua Sapit Premier Sarawak ti mega Menteri Pengeraja Asal enggau Pemansang Mengeri II sereta Penyanding Penemu Sarawak Delta UGGp, Datuk Amar Awang Tengah Ali Hasan.
Sama datai ngemata pengawa nya, dua Sapit Premier Sarawak, Datuk Amar Douglas Uggah Embas enggau Datuk Amar Profesor Dr. Sim Kui Hian, bala Menteri Kabinet Sarawak sereta Sekretari Perintah Sarawak, Datuk Amar Mohamad Abu Bakar Marzuki.
Geopark nya menua ti ngembuan taba sereta rampa geologi beguna antarabansa tauka nasional lalu diintu chara holistik bepuguka elemen pengawa ngintu, belajar enggau pemansang meruan.
Sarawak Delta UNESCO Global Geopark ti mungkur urung 3,112 kilometer persegi pemesai ngembuan penyelai geologi, pengelain biodiversiti nyengkaum endur mayas diau, kelimpah pesaka budaya Orang Asal ti bisi pengulih diangkat nyadi produk dagang temuai.
Pengawa ngaku nya mega nurai sejarah kediri ngagai Sarawak pengudah 17 taun mayuh raban ti betuai ke Opis Menteri Pengeraja Asal enggau Pemansang Mengeri Sarawak nagih status antarabansa nya.
Nya mega ngentapka agi penuduk Sarawak ba renggat global ba sukut pengawa ngintu pesaka rampa menua asal sereta pesaka budaya.
Dulu ari nya, diligit Sarawak Delta ti betuai ke Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh, udah nerima setipikit ngaku nya ari UNESCO di Paris kena 27 April 2026. – EDISI UKAS
