KUCHING: Sarawak Energy Berhad diaku nyadi organisasyen pemadu ransing bejalaika pengawa pengudah nerima Anugerah Khas Premier Sarawak: Organisasyen Responsif D2EI serimbai Pengerami Ngintu Hari Indu 2025.
Pengerami besulu ke jaku Kepelbagaian, Kesaksamaan, Ekuiti dan Inklusiviti (D2EI) nya dipenyadi Premier Sarawak, Datuk Patinggi Tan Sri Abang Johari Tun Openg di Kompleks Kunsil Nengeri Sarawak, empai lama.
Tuai Pegawai Eksekutif Kumpulan Sarawak Energy, Datuk Sharbini Suhaili madah ke anugerah nya asil pengeransing begulai pengereja serikat dikena nempa palan gawa ti inklusif. Kenyau ari taun 2017, iya madah, Sarawak Energy bejalaika bemacham inisiatif dikena negap raban indu nengah program baka ngembing sertea pemansang nyadi tuai.
“Tu sebagi ari skor kad korporat ninting taun serikat kelai pengeran negap raban indu,” ku iya.
Nambah ke nya, Mandal Presiden Kanan Servis Korporat, Siti Aisah Adenan mega dirintai dalam bup Sarawak Women Creating Legacies kelai ngenang jasa iya negika hak indu enggau nembiak.
Sarawak Energy mega nyendia perengkaguna ti ngelantang raban indu baka Atur Gawa Fleksibel (FWA), palan nyaga nembiak mit, Lumur SELWN Careline enggau ti bukai nentuka ripot dikachau ba palan gawa enggau diadu chara likun.
Serikat nya mega nerima Anugerah WEPs Malaysia 2024 enggau Anugerah Indu MyWIRA nunjukka pemesai jasa ba pemansang komuniti enggau nyendia palan gawa ti inklusif. Sarawak Energy keran semampai nyukung juluk pemansang meruan enggau atur pengawa ti bisi etika nentuka penyebela penempa nyadi pugu ngagai budaya gawa sida.
