KAWASAKI: Perintah Sarawak ba sebengkah randau enggau Gerempung Pemansang Teknologi Industri enggau Kuasa Baru (NEDO) mandangka pengeran Tanah Kenyalang nyadi pemungkal pemeruan rampa menua sereta kuasa ulih dikena baru nyengkaum teknologi gadung.
Sapit Sekretari Perintah Sarawak (Perambu enggau Pemansang Ekonomi), Datuk Seri Dr Muhammad Abdullah Zaidel madah ke sida ngerintaika inisiatif enggau langkar kereja pemansang pemadu baru Sarawak pasal pelin pemeruan, strategi idar kuasa enggau juluk nadai karbon.
“Awak tu mandang ke pengeran Sarawak nyadi pemungkal ba pemeruan rampa menua enggau kuasa ulih dikena baru nyengkaum teknologi baru,” terang iya, ditu tadi.
Ku iya, randau nya ngemeratka sukung NEDO ungkup projek lukut mit di Sarawak dikena ngasilka minyak bilun meruan (SAF).
